Villa Park – Birmingham, Nohprah 02: Haduh 46 ngut ki rangbah kiba la shah pyn ngat ha ki kyndon jong ka aiñ hadien ka jingjia pynklumar shuwa ban sdang ka jingïalehkai hapdeng ka Aston Villa pyrshah ïa ka Legia Warsaw.
Katkum ki tyllong khubor ba la ïohlum, la ïoh jingtip ba ki la don 5 ngut ki pulit ophisar kiba la mynsawjur na kadaw jong katei ka jingïa klumar bad ki paidnongkyshan kiba na bar ha Villa Park kaba ha Birmingham ha ka miet jong ka Sngi Palei.
Napdeng kitei ki 46 ngut ki rangbah, 43 ngut ki dei kiba la shah pynngat kyndon halor ka aiñ ‘wanrah jingklumar ha ki jaka paidbah, la ong ki pulit jong ka West Midlands.
Baroh kine ki rangbah kiba la shah pynngat ha ki kyndon aiñ kin hap ban wan mih hadien shuwa ban tian bishar kaba la pynkhreh da ka Birmingham Magistrates.
Arngut napdeng kitei, ki la shah pynngat kyndon halor ka jingktah kti pyrshah ïa ki pulit ophisar, ha ryngkat bad u wei u ba la shah kyndon ba bat ryngkat bad ka tari.
Na ka liang jong ki pulit ki la ïathuh ba kine ki briew kiba la shah pynngat ha ki kyndon jong ka aiñ ki dei kiba dang hapdeng ka rta 21 bad 63 snem, bad la ngeit ba 40 ngut ki dei na Poland katba kiwei la suba ba ki shong ki sah ha UK.
Ki paidnongkyrshan jong ka Aston Villa ki la ong “ka la don ka jinghuri hura kaba shyrkhei hangne” shabar jong ka Villa Park shuwa ba ka kynhun kan lehkai ïa ka lympung European Conference League pyrshah ïa ka klob kaba na Poland.
Ka jingleit ban kem ïa kitei ki briew ka la jia hadien ba ki la pymnih jingklumar pyrshah ïa ki nongpynïaid kam ka Legia Warsaw ki bym shym la lah shuh ban tehlakam ban sam ïa ki 1,000 tylli ki ticket sha ki paid nongkyrshan kiba na bar na bynta kane ka jingïakhun, la ïathuh ka West Midlands Police.
Katkum ka jingthoh hynnin ka Sngi Thohdieng, la ïoh jingtip ba ka Aston Villa ka la pynthikna ba ka la dep ban phah jingujor sha ka Uefa halor kane’ “bad ka jingbymlah ban tehlakam” shuwa ban sdang ka jingïalehkai.
Arngut ki ophisar na ka West Midlands Police, arngut na ka West Mercia force bad u wei na ka Derbyshire ki la shitom bad mynsawjur na kane ka jingjia, ha kaba u wei u ba la shah kawang da ka kynja tiar meh ding (flare) na durkhmat.
Ha kaba ïadei bad kane, na ka liang jong ka West Midlands force ka la pynpaw ba kan dang ïai thwet bad peit thuh lyngba ka kor CCTV.”
