Nongstoiñ, Nailar 25: Ka Ophis jong ka District Sports Officer West Khasi Hills District, ha ryngkat ka jingïatreilang bad ka Ophis jong u Deputy Commis-sioner West Khasi Hills, District, mynta ka sngi ki la rakhe ïa ka ‘National Sports Day 2023’ hapoh Nongstoiñ West Khasi Hills District, da ka mynsiem kaba shitrhem bad la sakhi ruh ïa ka jingwan ïashim bynta jong kiba ngut ki riew ieit sport kaba kynthup naduh ki khynnah haduh ki samla.
Kum ka dak ban rakhe ïa kane ka sngi kyrpang kaba ïadei bad ki kam ïalehkai, la pynlong ïa ka jingïakop ñiah cycle bad ka jingïamareh thong na ka bynta ki kynthei bad shynrang ha ka jingjngai kaba 7.5 km.
La sdang ïa kane ka prokram ha ka por 6 baje mynstep thik, ha kaba u SP jong ka West Khasi Hills District u Bikram D. Marak, ha ka jingïadon ryngkatlang jong I Kong B. Syiem, DSO Nongstoiñ bad kiwei pat ki nongtrei sorkar, u la kaweh lama ban plie ïa ka jingïakop ñiah cycle bad jingïamareh thong.
Haba ai jingkren, u la ai mynsiem ïa baroh ki nongwan ïa shim bynta ha kane ka sngi ba kin ai ïa kaba bha tam, la ka dei ha kano kano ka bynta kaba ki don ïa ka sap kaba ïadei bad ki kam ïalehkai.
La sdang bad la pynkut ïa kine ki jingïakop ha Campus D. C. Office. La ïoh ruh ban sam ïa ki khusnam bad syrnod sha ki nongjop da ki bor pynïaid distrik, haba ki la ai mynsiem bad ïaroh ïa ka jingtrei shitom jong ki.
