Mawkyrwat, ‘Nailar, 25: Kum shibynta ban ai ka jingpynsngewthuh ha ki khynnah skul halor ka ka NALSA (Child friendly Legal Services to children and their Protection) Scheme 2015 bad Juvenille Justice (Care and protection of Children) Act 2015, ka ophis jong ka District Legal Services Authority (DLSA), South West Khasi Hills District Mawkyrwat mynta ka sngi ka la pynlong ïa ka jingïalang ha Rising Secondary School, Sohkhyllam, (RSSS), South West Khasi Hills District, Mawkyrwat.
Ka kong D. Sohtun, CJM & Secretary DLSA, South West Khasi Hills District haba ai jingkren ha ka jingïalang ka la ong ba la pynlong ïa kane ka Awareness Programme da ka jingthmu ban hikai bad ban pyntip paidbah ha kaba ïa dei bad ki hok jong ki khynnah bad ki jingïada kiba ki dei ban ïoh bad ki lad ai jingshakri lyngba ki skhim bapher bapher. Shuh shuh ka la ong ba ka NALSA (Child friendly Legal Services to children and their protection) Scheme 2015 ka ai ïa ki hok bad ki jingmyntoi ha kaba ïa dei bad ki khunlung khynnah bad kumno ban pynsngewthuh bad hikai ïa ki ba ki don hok ban tip ïa ki hok jong ki kat kumba la buh da ka konstitushon bad ki aiñ ki ka nun kum ka Child Marriage Restraint Act, Child Labour Prohibition Act, Juvenille Justice Act, POCSO Act, bad kiwei kiwei.
Nangta, ka la kyntu ruh ïa ki khynnah kumjuh ruh ïa ki kmie ki kpa ban wan shakhmat lada ki donkam kum ïa kitei ki jingïarap kiba ka sorkar ka la mang na ka bynta jong ki bad ka la pyntip ruh ba lada don kino kino ki jingujor ne ki donkam ki nongïasait-aiñ ki don ha ka ïa ka District Legal Service Authotiry (DLSA) kaba dei kawei na ki ophis ban ïarap ïa kiba donkam jingïarap ha ka aiñ ka kanun khlem da siew pisa ei ei.
Ha ka jingai jingpynshai jong u bah S.R. Kharkongngor, District Child Protection Unit, South West Khasi Hills District u la ong ba ïa ka Juvenille Justice (Care and Protection of Children) Act, 2015 kaba don ha ka ïa ki ar tylli ki mat kata ka Child in Need of Care and Protection bad ka Child in Conflict with Law kaba la pyntreikam naduh ka 15 tarik u Kyllalyngkot, 2016 bad kan bujli ïa ka Juvenille Justice Act, 2000. Kane ka Act ka ïa dei bad kito ki khynnah kiba ïa takhuh bad ka aiñ bad ruh ïa kito ki khynnah kiba donkam jingsumar bad jingïada da kaba pynbiang ïa ki jingdonkam kat kum ka jingbthah kaba hap hapoh katei ka aiñ. “Ka jingthmu jong kane ka aiñ ka long na ka bynta ban pynduna ïa ki kam sniew ba la leh da ki khynnah kiba hapdeng ka rta 16 haduh ka 18 snem”, ong u bah Kharkongngor.
