Ka kynhun Myntri jong ka Sorkar Jylla ba ïalam da u Myntri Rangbah ka Jylla u Conrad Kongkal Sangma dang shen ka la leit ban ïakynduh ïa u Myntri Rangbahduh ka ri u Narendra Modi ban pynsngew halor ki mat jingdawa ba ki paidbah ka jylla Meghalaya ki la dawa ban pynurlong noh ïa ka Inner Line Permit, ka jingpynrung ïa ka Ktien Khasi bad Garo ha ka Khyrnit Baphra bad kiwei kiwei de ki mat.
U paidbah ka jylla haduh mynta u dang ïai ap ïa ka jubab na ka Sorkar Pdeng lano kan pynurlong ïa kine ki jingdawa hadien ka Iingdorbar Thawaiñ ka ladep mynjur ruh da ka Resolution ha ka 19 tarik u Nohprah, 2019 ban pyntreikam ïa ka Inner Line Permit ha kane ka Jylla Meghalaya bad ban pynurung ïa ka Ktien Khasi bad Garo ha ka Khyrnit Baphra.
U paidbah u dang ïai kynmaw kyndiang ïa ka jingleit sha Delhi da ki nongïalam ka BJP-Meghalaya Unit pynsngew hakhmat jong u Myntri ka tnat Kam Pohing ka ri u Amit Shah halor ka jingdawa ban pyntreikam ïa ka aiñ ïada mynder ne ka Inner Line Permit ïa kaba ka Iingdorbar Thawaiñ ka ladep mynjur. Ki sengbhalang ha kane jylla haduh mynta ki dang ïai pynsngew sha ka Sorkar ba kan dei ban leit buddien ïa kane ka jingdawa na ka Sorkar National Democratic Alliance (NDA) sha Delhi namar wat hadien lai snem kynthih ba ka Iingdorbar Thawaiñ ka ladep phah ïa ka Resolution sha ka Sorkar India hynrei haduh mynta ka Sorkar kam pat lah satia ban ai ïa kano kano ka rai la kan ai jingbit neem ban pyntreikam ïa kane ka aiñ ha Meghalaya.
Lah ban ong, ka jingleit Delhi jong ki nongïalam ka BJP shwa ka elekshon, ka shu long tang ka kam pynbiej ban ïoh khroh vote ha kato ka por hynrei ka Sorkar Pdeng kam shym la sngap satia ïa ka jingpynsngew wat na ki nongïalam ka BJP na kane ka Jylla Meghalaya.
Ka Sorkar Jylla bad ka Sorkar India kam dei shuh ban dang kam ba ka jingdawa ïa ka Inner Line Permit ha ka jylla Meghalaya ka dang dei tang ka jingdawa jong ki Sengbhalang namar ha ki snem baladep ki paidbah ki la mih sha surok ban pynpaw ba ki kyrshan shisha ïa kane ka aiñ kaba khanglad ïa ka jingwan rung kyrthep jong ki bar jylla bad ki mynder ri shapoh ka jylla Meghalaya.
Haduh mynta, ka Jylla Meghalaya ka dang don tang ïa ka aiñ ïada ba la tip kum ka Meghalaya Residents Safety and Security Act, 2016 kaba ïasyriem hi malu mala ïa ka Inner Line Permit hynrei wat kane ka aiñ ruh haduh mynta kam pat treikam pura namarba wat hadien saw snem ka Sorkar ka dang lah ban pynieng tang ïa kawei ka Entry Point ne ka khyrdop rung ban talasa ïa ki briew kiba wan nabar ban rung shapoh ka jylla Meghalaya. Katba ka jingpynieng ïa ki khyrdop rung ne mih lane kita ki Exit Point haduh mynta kim pat urlong satia wat tang kawei ruh. Nalor kata, wat ki District Task Force ba la dei ban thaw ïa ki district bapher bapher jong ka jylla katkum ba la pruiddak ha ka aiñ Meghalaya Residents Safety and Security Act, 2016 ruh kim pat treikam satia.
Kane ka jingsuki shaba palat jong ka Sorkar Jylla ban pynurlong ïa kane ka aiñ katkum ka jingdawa jong ka por ka la pynlong ïa ki kynhun bapher bapher bad wat ïa ki paidbah ban khñium ïa ka Sorkar Jylla.
Kumba ka paw mynta, ka Sorkar Meghalaya Democratic Alliance ka shu khih khohreh tang ha ka kam ïapynbeit pud namarba ka Sorkar Pdeng ka la bthah ïa ka Sorkar Assam bad ïa ka Sorkar Meghalaya ban ïa pynbeit hun mynsiem. La san phew wei tylli ki snem, ka jingbym don ïa u pud u sam uba biang, ka la wanrah ïa ka jingïam kthang jong ki ing ki sem kiba la mad ïa ka jingshah dkhat jubor ka jingim ha khappud kiba long kum u sohkhliang uba dang ïai sah haduh mynta mynne.
Ka jingdawa ban pynrung ïa ka Ktien Khasi ha ka Khyrnit kaba Phra ka la shu sahkut ha suiñ, ka jingïakren ban ïapynbeit ïa pud u sam bad ka Jylla Assam ruh ka la shu sahkut ha suiñ bad shu sah sa tang ha ka jingïaburom ïa ka ‘Status Quo’ bad mynta ka mih sa ka jingdawa ban pyntreikam ïa ka Inner Line Permit.
Katba nang mih ki sngi bad nang ïaid ki snem ka jingdawa ka mih kawei hadien kawei pat, hynrei ym pat don satia wat tang kawei ruh ka jingdawa kaba ki paidbah kin ïoh kumba la khmihlynti.
Kumba ka long haduh mynta, ka Sorkar Meghalaya Democratic Alliance kaba bat ïa u lakam synshar hapoh ka Jylla Meghalaya ka la kam ba ka la lah ban wanrah ïa ki kam pynroi hynrei kaei pat kaba u paidbah u ïohi ka long ba kane ka Sorkar kam pat leh eiei wat ha kine ki tylli ki snem ba ka la bat ïa u lakam synshar hapoh ka jylla.
