Shillong, Nailar 25: Ka tamasa lehkai kaba la tip da ka BSF Inter Frontier Games jong ka Judo, Wushu, Gymnastics, bad Taekwondo la ïoh ban pynhap pyrda noh ha ryngkat ka phuh ka phieng hynne ka Sngi Thohdieng, 25 Nailar, 2023 ha NEHU Shillong.
Ha kane ka tamasa lehkai ki la don palat 700 ngut ki nongïalehkai na 11 tylli ki Frontiers jong ka Border Security Force kiba la ïashimbynta ban pynshit pynsngaiñ ïa kane ka tamasa lehkai kaba saw sngi. Ka Sonali Mishra, IPS, ADG, BSF (Eastern Command) Kolkata, ka la long kum ka Kongsan ha kane ka sngi ha ryngkat bad u Pradip Kumar, IPS, IG BSF, Meghalaya Frontier, Prof, u Prabha Shankar Sukla, Vice chancellor NEHU, Sh T S Chavan, AD sports authority of India, ki ophisar ba la kham rangbah bad ruh ki heh ki haiñ jong ka BSF.
Kane ka jingwan ban don bynta jong ka ha kane ka sngi ka la long ka jingai mynsiem ïa ki nongïalehkai bad ruh ïa baroh kiba long dkhot ha ki jingïalehkai bapher bapher. Ha kane ka jing pynhap pyrda ïa kane ka lympung lehkai la pynitynnat ruh lyngba ka jingïaid march past, haba ki nongïashimbynta na ki Frontier bapher bapher ki la ïashimbynta shitrhem da ka jingïatylli.
Hadien kane la ïoh ïa ka cultural programme kaba la pyni da ki khynnah jong ka BSF School bad ka kynhun ki BSF. Ka Sonali Mishraa ka la ïoh ruh ban pynkup burom ruh ïa ki nongjop ha ki jingïalehkai kiba kynthup ïa ka judo, Wushu, Gymnastics, bad Taekwondo ïa ka jingtrei shitom ka jong ki.
Haba ai jingkren ha kane ka sngi pynkut, ka Sonali Mishra, IPS, ADG, BSF (Eastern Command) Kolkata, ka la pynpaw ïa ka jingkordor jong ka sports ban kyntiew bad ruh ban ïoh ïa ka met kaba shait na ka bynta ka jingbha. Ka la ban biang da kaba ong ba ka BSF ka la ïohi ïa ka jingdonkam ban pynneh ïa ka met kaba shait bad ruh ban tyngkai ïa ka sap kaba ngi don.
Shuh shuh, na ka liang jong ka Kongsan ka la bynrap ruh da kaba pynpaw ba kum kine ki tamasa lehkai kam ïarap tang ban pynpaw ïa ka jingkhlaiñ ka bor met hynrei ka ïarap ruh ïa ka jingmut jingpyrkhat jong ki nongïashimbynta. Ka la ïaroh ïa ka jinglen lade bad jingtrei shitom jong ki kynhun ba jop bad ruh ïa ka BSF kaba la ïada ïa ka India ha ki khappud bad ruh ha kajuh ka por ban pynlong ïa kine ki jait sports.
ïa kane ka lympung la khylliap pyrda noh da ka Sonali Mishra, ADG, BSF (Eastern Command), bad ka kynhun kaba la jop ha ka Judo kaKa Sonali Mishrai long ka Gujrat bad Jammu kiba la wan ha ka kyrdan ba nyngkong bad ba ar. Katba ha ka Wushu, ka Punjab bad ka Jammu ki la wan kyrdan ba nyngkong bad ba ar. Ha ka Gymnastics, ka Jammu ka la jop ba nyngkong, katba ka Kashmir ka la wan ha ka kyrdan ba ar. Khadduh, ha ka Taekwondo, ka South Bengal ka la wan ba nyngkong bad kyrdan ba ar da ka Tripura.
