Nongstoiñ, Naitung, 28: Ka District Legal Services Authority (DLSA), Nongstoiñ hapoh ka jingpynïaid jong ka National Legal Services Authority, ka la pynlong ïa ka prokram ai jinghikai kaba bnïah kaba thmu ban kyntiew ïa ka jinglah jong ki Pulit Ophisar/ Personnel bad Panel Lawyers/Legal Aid Counsel (LAC) ha ki bynta bapher bapher kiba ïadei bad ki kyndon aiñ. Ïa kane ka prokram la pynlong ha Conference Hall jong ka District and Sessions Court, Nongstoiñ.
Ka jinghikai ka kynthup ïa ki mat kiba kongsan kum, ka jingsngewthuh ïa ka rukom treikam jong ka jingai jingtip ba nyngkong (FIR), ka jingpynïapher hapdeng ka aiñ pynshitom bad ka aiñ paidbah.
Ki jait kam runar kiba lah ban pynngat bad ki bym lah ban pynngat, kiba lah ban ai jamin bad ki bym lah ban ai jamin. Ka jingïoh kloi ïa ka jingbishar hok ha ka por ba la kem kloi, ka por ba la kem, bad ka por ba la pynngat.
Ka jingpynleit jingmut kyrpang halor ka jingtreikam jong ki JJ Board bad ka tnat pulit ba kyrpang jong ki khynnah rit (SJPU).
Ïa kane ka prokram la pynïaid da ka kong F.C. Rymbai, Chief Legal Aid Defense Counsel, ha ka jingdon ryngkat lang jong u Bah M. Skhemlon, District and Sessions Judge bad Chairman ka DLSA, Nongstoiñ, Kong S.M Wannïang Principal Magistrate JJB, Bah D.Moksha Addl. U Superintendent jong ki pulit ka West Khasi Hills, u Bah K. Wahlang, u P.P. Ka Pleader Sorkar, Nongstoiñ, Kong B. Kharkrang, ka Nongpynïaid aiñ, Kong V. Kharhari Nongpynïaid aiñ, ki nongïashim bynta kiba la wan na tnat pulit bad kiwei kiwei ki tnat sorkar kumjuh ruh ki rangbah bad ki longkmie jong ka thaiñ Nongstoiñ.
U Bah M. Skhemlon u ba dei u Chairman bad District and Sessions Judge DLSA, Nongstoiñ. haba ai jingkren ha kane ka sngi u la ban jur ïa ka jingdonkam jong kum kine ki prokram ai jinghikai ban pynthikna ïa ka jingpynpoi hok ïa ki jingshakri aiñ bad ka jingbishar hok sha baroh ki bynta jong ka imlang sahlang.
Nalor ki jingkren ba kongsan ba la ai da ka kong S.M. Wanniang kaba dei ka Principal Magistrate JJB, Nongstoiñ, u Bah K.Wahlang, u Nongmudui Paidbah Govt. Pleader, Nongstoiñ, bad u Bah D. Moksha, Additional Superintendent of Police, West Khasi Hills District.
La pynlong ruh ïa ka jingïakren ïakren ha kane ka prokram ban ailad ïa baroh ban ïasam ïa ki jingshem jong ki, ha kaba ïadei bad ki hok bad ki kamram katkum ka aiñ kiba ai jingmyntoi ïa baroh kiba don ha katei ka jingïalang.
Kane ka jingthmu jong ka DLSA, Nongstoiñ ka pynpaw ïa ka jingangnud jong ka ban pynbha ïa ka jinglong jingman jong ki jingïarap aiñ bad ban kyntiew ïa ka jinglah treikam jong ki nongshim bynta ba kongsan ha ka tnad bishar.
