Shim bynta ki lai tylli ki kynhun Balang ha ka carol jong ka Seng Samla Mawkyrwat

Mawkyrwat, Nohprah 30: Ka Seng Samla Shnong Mawkyrwat, South West Khasi Hills District kum shibynta jong ka jingkynmaw burom ïa ka sngi jingwan long briew U Trai Jisu ne ka Christmas ki la pynlong ka jingïaid paidbah ne carol ha kaba ki lai tylli ki Balang ki la wan ïashimbynta.
Ki lai tylli ki Balang kiba la wan ïa shimbynta ki kynthup ïa ka Jingïaseng Samla kiba don ha Mawkyrwat ka kata Balang Roman Catholic, ka Church of God, bad ka Balang Presbyterian bad kane ka long ruh kum ka dak jong ka jingpynïatylli hapoh ka shnong ka thaw bad ka shongsuk shongsaiñ.
Ïa ka Carol la sdang ïaid na Dorbar Hall Mawkyrwat sha Civil Hospital Mawkyrwat sha Ïew bad la pynkut biang ha ka jaka ba sdang.
Hadien ba la dep pynlong ïa ka jingïaid carol kala pynlong ruh ïa ka plie ïa ka jingrakhe ïa ka jingkynjoh jong ka sengsamla shnong sha ka 30 snem ha ka jingai jingshakri ïa ka shnong da kaba pynher ïa ka lama bad ban pyllait paitbah ia ka ka Almanak jong u snem 2024 da u bah Kitborlang Nongrem, State President jong ka NPYF kum u kongsan ha kane ka sngi, bad ha kane ka jingsdang jong ka jingrakhe ïa ka jingdap 30 snem ka Seng Samla Mawkyrwat ka la pynlong ruh ïa ka jingot ïa u cake lem bad ki Gospel Musical Evening na bynta ki khun khynnah bad ki khun samla ka Mawkyrwat.
Ha kane ka sngi la ïa don lang da ki nongkitkam barim jong ka Seng Samla Mawkyrwat, u Myntri Shnong Mawkyrwat, u bah R.R. Lyngkhoi lem bad kiwei kiwei.