Shi taïew hadien jong ka Khrismas ka pyrthei kan sa jam noh sha uwei pat u snem ba thymmai na u 2023 sha u 2024. Ym baroh hi ngi shemphang kaei ka jingmut jong une u snem ba thymmai bad kumno la ïoh ïa kane ka jingkheiñ ïa u snem. Wat la ïa ka Khrismas la shu rakhe tang kum ka jingkheiñ ïa kata ka aiom ba la 25 tarik ka dei kaba ki long shuwa ki la shu shim kyllum, hynrei khlem pep kadei ka por kaba la kha ïa u Jisu kaba la pynkylla lut ïa ki jingkheiñ jong ka pyrthei. Ha shuwa ka jingkha ïa u Jisu la buh jingkheiñ ïa ki snem ha ka por ne ka jingsynshar jong ki syiem ki bapher bapher. Hynrei hadien jong ka jingkha ïa u Jisu la pynkylla lut ïa baroh sha ka snem ba la kha ïa u Jisu bad la khot ïa kane ka snem da ka A.D kaba mut hadien ka jingïap ka jong Jisu. Hynrei ka jingmut tynrai jong ka A.D ha ka ktien Krik ka dei Anno Domini kaba mut ka snem jong u Trai jong ngi.
Ka jingwan jong u Trai Jisu sha kane ka sla pyrthei ka la pynkylla lut ïa kiei kiei baroh kawei kaba baroh ngim lah ban lait na u ka long ka khubor kaba khraw katta katta. Baroh ki jingkheiñ ki sdien ha u, ki snem baroh kila kylla lut tang sha u bad ha ki por ba mynshuwa ïa ki snem la ju kheiñ kat kum ka jingsynshar jong ki syiem. Hynrei haduh ba la wan ma u kum u Syiem jong ki Syiem baroh ka jingkhieñ bad ka jngñiew ki la hap lut ha ka kyrteng bad ka tyrpeng ka jong u bad khlem ma u ym lah shuh ban khieñ ïa ki snem ruh bad mynta ngi ïoh ïa ki snem Shuwa u Khrist bad hadien u Khrist ne kata ka Before Common Era/Before Christ (B.C) bad ka Anno Domini (AD) kaba mut ha ka ktien Latin ka snem jong u Trai jong nga. Kumta khlem U Jisu ym lah shuh ban kheiñ ïa ki snem ha kine ki sngi.
Ka Baibl ka ong bad u Jisu u dei u Syiem jong ki syiem, hato ka long shisha kumta ! Kat kum ba la long mynta hato ngin lah ban len ïa kata namar ba ka jingkhieñ snem na ki Syiem bapher bapher bad mynta pat ka la kut noh ha kawei ka jingkhieñ beit kata ka dei ka A.D kaba lah ban ong ba ka dei ka snem jong u Syiem ki syiem. Niuma shaphang ka Khristmas namar ba dei tang ki Khristan kiba rakhe ïa ka, hynrei ïa ka snem thymmai ka pyrthei shi satlup ka rakhe ïa ka. Hooid ngi ju ïohsngew ruh ïa kita ki Bengali New Year, Assemese New Year, Chinese New Year bad kiwei kiwei de, hynrei kine baroh ki shu neh ha ki rukom leh tynrai katba ïa ka snem A.D ka jong u Trai Jisu la rakhe baroh kawei ka pyrthei bad ka ïeng kum kawei ka jingpynskhem ïa kiei kiei baroh bad khlem kane ym lah shuh ban kheiñ?
Bun bah ha ryngkat ka jingrakhe ïa u snem bathymmai ki kwah ruh ban pynthymmai ym tang ïa u snem, hynrei wat ïa la ka jong ka jingim hi. Hynrei shisha ngim ïohi koit ïa kata ka jingkylla jong ka jingim, hynrei ïa kito kiba pdiang bad sngewthuh ïa ka jinglamphrang jong ka Khristmas bad pdiang ïa ka jingpynim ki mad shisha ïa kaba kum kata ka jingpynthymmai namar ba Baibl ka ong ba “lada uei uei ruh u don ha U Khrist, u long u jingthaw bathymmai; kiei kiei ruh ki barim ki la duh noh, ha khmih kiei kiei baroh ki la jia long ki bathymmai”. Kam pher la kum ki riew paidbah ngi ngeit ne ngim ngeit hynrei baroh ngi don ïa ka hok ban ïa ki jingtip kiba lehse ngim lah ban ïoh ha ki rynsan ba long paidbah kum ha ki lad pathai khubor. Hynrei ka long ka kabu haba la tip lada donkam lah ban pyrshang ïa kaei kaba long ka jingmyntoi ha ka jingim bad khamtam ïa ka mynsiem kaba kordor jong ngi.
Ka long ka hok bad ka kabu jong ngi baroh shi met shimet ban pyrshang ïa baroh ki lad jingïarap bad ka jingim jong ngi ka dei kaei kaei kaba long khia (serious). Kumta ka jingwan jong u snem bathymmai ka long ka kabu ïa kiba bun ki para briew kiba ngi ju ïohsngew bha ïa kita ki jingthmu rai jingmut ne ki New Year Resolutions jong kiba bun. Kumta ki jingrai jong ngi ki long beit kat ki jingshemphang kiba ngi tip kumno ban pyndonkam ïa ki. Kum ka lad pathai khubor ngi kitbok bad ai khublei snem thymmai basuk ïaphi baroh ki nongpule baieit jong ngi: To phin ïohmad shisha ïa kiei kiei kiba pynthymmai ïa ka jingim ym tang ïa u snem ba thymmai.
