Bengaluru, Nohprah 30 : Ka kynhun ïalehkai Hockey (kynthei) jong ka India, hynne ka Sngi Saitjaiñ, ka la pynbna ïa ki kyrteng jong ki 18-ngut ki dkhot ban mihkhmat ïa ka Ri sha ka FIH Hockey Olympic Qualifiers Ranchi 2024, kaba la khreh ban long ha Ranchi naduh 13 haduh 19 tarik u Kyllalyngkot.
Ka kynhun ka phaikhmat ban jam sha katei ka lympung ha Ranchi ha ryngkat bad ka thong ban khylliap ïa ka lympung kum kawei napdeng ki lai kynhun ba wan ha ki kyrdan ba shakhmat bad ruh ban buh jaka na bynta ka Paris 2024 Olympics.
Ha katei ka lympung, ka kynhun India ka la shah pynngat hapoh ka Pool B, ryngkat bad ka New Zealand, Italy, lem bad ka United States. Katba ka Germany, Japan, Chile, bad ka Czech Republic kin ïakhun napoh ka Pool A.
Ka India kan sdang ïa ka lynti ïaid pyrshah ïa ka United States ha ka 13 tarik u Kyllalyngkot, bud sa ka jingïalehkai pyrshah ïa ka New Zealand ha ka 14 tarik, bad khadduh pyrshah ïa ka Italy ka long ka jingtïakhun kaba khadduh napoh ka Pool B ha ka 16 tarik.
Ka kynhun jong ka Ri (Indian Women’s Hockey Team) ban shimbynta ha ka FIH Hockey Olympic Qualifiers Ranchi 2024 ki kynthup ïa ka arngut ki player ban ap kol (goalkeeper), Savita bad ka Bichu Devi Kharibam. Ha kajuh ka por, ka Nikki Pradhan, Udita, Ishika Chaudhary, bad ka Monika ki la shah thup kum ki bak (defender) hapoh ka kynhun.
Ka Nisha, Vaishnavi Vitthal Phalke, Neha, Navneet Kaur, Salima Tete, Sonika, Jyoti, bad ka Beauty Dungdung ki long ki player bynta ba shapdeng (midfield). Ka Lalremsiami, Sangita Kumari, Deepika, bad ka Vandana Katariya kin long ki player ba shakhmat (forward).
Ha kane ka kynti, ka Savita, kaba dang shen ka la khur ïa ka khusnam FIH Goalkeeper of the Year Award, sa shi sien pat kan lam lynti ïa ka kynhun kum ka kapten. Katba ka Vandana Katariya, kaba la ïohnam kum ka player ba nyngkong jong ka India ban pyndep haduh 300 sien mihkhmat ïa ka Ri, ka la shah jied ban long kum ka symbud kapten.
Haba ai jingkren halor ka jingjied ïa ki nongïalehkai, u Chief Coach jong ka kynhun, u Janneke Schopman u la ong, “Ka FIH Hockey Olympic Qualifiers Ranchi 2024 ka dei ka tournament kaba kongsan ban ïoh jaka ha ka Paris 2024 Olympics. Ka long kaba donkam ïa ngi ban ïatreilang kum ka kynhun khnang ban poi sha ka thong kumba ngi la thmu. Hadien ba ngi la bishar bñiah, ngi la lah ban jied ïa ka kynhun katkum ka jingtbit jong ki player. Kumjuh, ka Savita bad ka Vandana ki la ïakynduh shibun ki jingeh ha kiba bun ki khep, hynrei nga ngeit skhem ba ki long ba khreh ïalade kum ka kapten bad Symbud kapten.”
