Shim bynta da ki hajar ngut ki Hindu ha ka jingpynngam ïa ki blei thaw ha Wahumkhrah

Shillong, Risaw 13: Kumba ju long manla u snem ka jingeh niam Durga Puja kaba ju long ha ki 4 sngi kaba la sdang mynta u snem naduh ka sngi Thohdieng ka la kut noh ha ka sngi U Blei da kaba pynngam ïa ka blei thaw hapoh ka Wahumkhrah.
Ha kane ka sngi ki riewngeit Hindu kiba sah ha jylla bad ha nongbah Shillong, kila pynkut noh ha ka sngi U Blei ïa ka lehniam Durga Puja ha kaba da ki hajar ngut ki riewngeit na kylleng ki jaka, ki la pyndep ïa ka jingpynngam um ïa ki blei hapoh ka Wahumkhrah da ka jingsngewbha ha ryngkat bad ka shad kmen bad ka tem ka put na ki riewngeit ha kane ka jaka.
Kumba la batai kane ka jingleh niam kaba 4 sngi lynter, ka la sdang naduh ka 10 tarik mynta u bnai haduh ka 13 tarik u mynta u bnai Risaw bad la pynkut ïa kane ka lehniam kaba shisien shisnem da kaba pynngam noh ïa ki blei thaw ha ki wah.
La ong ba kane ka jingpynngam blei thaw ka la sdang naduh ka por mynstep ha kaba ki riewngeit Hindu ha nongbah Shillong, ki la ïamih na la ki Puja Pandal ban bud ïa ka kali kaba kit ïa ki Blei thaw Durga bad ki la leit bret ïa ki ha ka Wahumkhrah.
Ha kaba iadei bad kane na ka liang ki nongïalam jong ka Central Puja Committee, kila ïathuh ba mynta u snem, ki don kumba 250 tylli ki Puja Mandal Committee ha ka jylla Meghalaya bad tang ha nongbah Shillong ki don kumba 64 tylli ha kaba kane ka jinglehniam ka la long kaba ïaid beit ïaid ryntih.
Ha kane ka jingpynngam bad ka jinglehniam puja la ïohi ruh ba ki pulit ki la pynjur bha ïa ka jingpahara ha kylleng ki jaka ban pynthikna ba kane ka jinglehniam leh rukom ki Hindu kan long kaba ïaid beit ïaid ryntih khlem kano kano ka jingpynkheiñ ïa ka shongsuk shongsaiñ.