Shillong, Rymphang, 14: U Lyngngoh u National Vice President ka BJP ba sahdien ka Shella Constituency

Dr. M. Chauba Ao, uba long u National Vice President jong ka BJP bad uba long ruh u nongpeit ïa ka Jylla Meghalaya u la pynpaw ka jinglyngngoh ban lap hi dalade ïa ka jingsahdien jong ka Shella Constituency ha ka jingleit iuhkjat jong u sha ka shnong Shella ha ka 12 tarik u Rymphang, 2023 ban pan jingkyrshan na ki paidbah na ka bynta ka kyrtong jong ka BJP ka Kong Arena Hynniewta.
Ha ka jingïakren bad ki lad pathai khubor, u Chauba Ao, u la ong ba watla ka Shella Constituency ka dei kaba kiew bha ha ka jingpynmih ïa u mawshun ba la shalan sha ka Ri Bangladesh hynrei kane ka thain ka dang long kaba sahdien bha ha baroh ki liang.
“Lada peit ïa ka jingshalan mawshun, ngam lah ban ong la ka long beaiñ lane ka long katkum ka aiñ hynrei ka jingmih khajna ka duna bha. Hynrei lada ka BJP kan ioh bat ïa u lakam synshar kan kyntiew ïa ka jingïoh khajna kaba kot da 60-70 klur na ka jingshalan ïa u mawshun na kane ka thaiñ,” u la ong.
U la kynthoh ruh ïa ka jingbym leh eiei jong ki MLA ha ki 40 snem ba la leit noh namarba kane ka Constituency kam don satia wat tang kawei ruh ka Hospital, ka skul kaba bha bad khamtam eh ka surok kaba bha kiba long ki jingdonkam bakongsan eh jong ki paidbah nongshong shnong.
“Nga iohi ba ha ki 40 snem ba la leit noh, ki nogmihkhmat ki khlei ïa ki jingkular kawei hadien kawei pat hynrei kim shym la leh eiei. Ym don hospital, ym don skul, ym don kolej. Ngi donkam ban jied ïa ka kyrtong jong ka BJP na kane ka jaka khnang ba ngin dup lah ban tei ïa ki hospital, ki skul bad kolej nalor ba ka surok ruh ka long kaba sniew,” u la ong bad bynrap, “ka thong jong ka BJP ka long beit tang ïa ka roi ka par.”