Shillong Premier League 2023: Da 5 kol pynliem ka Ryntih SC ïa ka Nongthymmai SC

Shillong, Lber 31: Ka hat-trick na u Andy Mawthoh, kaba dei ruh kaba nyngkong mynta ka samoi, ka la pynïoh ïa ka Ryntih SC ïa ka jingjop da kaba pynliem ïa ka Nongthymmai SC da 5-0 kol ha ka jingïakhun ka lympung Shillong Premier League 2023 ha madan SSA Stadium- First Ground, Polo, hynnin ka Sngi Saitjaiñ.
Ha kane ka jingïalehkai, u Andy u la ïoh ban pynkhihjar ha ka 25, 64 bad 68 minit, katba ki ar kol kiba tam pat la thep da u Banehskhem Khongsdam (75′, 90’+4). Kane ka dei ka jingjop kaba bun kol tam mynta ka samoi bad ka sien kaba nyngkong ïa ka Ryntih ban nym shah thep (clean sheet).
Kane ka lympung kaba la jam mynta sha ka wat ba lai (3rd round) katba ka Ryntih ka dang ïakhun ban khur ïa ka jingjop kaba nyngkong hadien ba ïakhaid bad ka Mawlai SC ha ka jingïakhun ba nyngkong shuwa ban shah rem ha ka Shillong Lajong FC dang ha ka taïew ba ladep. Katba ka Nongthymmai, ka la dep ban ïoh khur 3 point hadien ba jop ïa ka Nangkiew Irat SC ha ka Lah Sngi U Blei jong ka taïew ba ladep.
Ka Nongthymmai ka la ïaleh ban bteng khur jingjop ha kane ka jingïakhun bad ïoh ruh katto katne ki kabu hynrei tang khyndiat eh kiba la wanrah jingma ïa ka liang pyrshah. Ha kawei pat ka liang, ka Ryntih, ka la sdang suki suki shuwa ba kan ñion.
Dei tang hadien ba la ïaid 20 minit ba ka Ryntih ka la sdang ban ñion da kaba bteng ban pashat bol shakhmat ka phyllaw kol jong ka liang pyrshah. Ka kol kaba nyngkong ka la wan hadien ba u Wanshan Dkhar u la ïoh ban pashat ïa ka bol sha u Andy, u ba la ïoh ban khyrwit jlang ïa ka bol shapoh kol, khlem da ailad ïa u rangapkol ka Nongthymmai- u Senapati Mandal ban ïada ïa ka bol.
Ki la don ruh katto katne ki kabu na bynta ka Ryntih shuwa ban kut ka kylla step – hynrei baroh kine ki kabu ki la sepei namar ym shym la don ba lah ban pynurlong bad ka kylla step ka la kut da 1 kol ka Ryntih katba ka Nongthymmai 0 kol.
Ka Ryntih ka la bteng ban tehlakam ïa ka jingïakhun wat ha ka kylla miet, bad kumba katto katne por u Andy u la ïoh ban thep sa ïa ka kol kaba ar ha ka 64 minit shuwa ba un khyrwit ïa ka hat trick ha ka 68 minit.
Ha ka 75 minit u Banehskhem u la ïoh ban pynbud ïa ka kol kaba saw, nangta shuwa ban kut ka minit pynjlan ïa ka por ïalehkai, u la ïoh sa ban thep ïa ka kol kaba ar (90+ 4 minit) kaba dei ka kol kaba san ïa ka kynhun.
Lyngba kane ka namjop, ka Ryntih na ka kyrdan ba hynriew ka la kiew kyrdan ba lai ha ka miej kheiñ point ka SPL 2023. Ka ïaryngkat bad ka Mawlai da 4 point hynrei ka ïoh ban lamkhmat lyngba ka jingïapher kol (goal difference) (+3 to +1), katba ka Mawlai ka dang ïalehkai tang 2 sien.
Ka jingïakhun mynta ka sngi kan long hapdeng ka Mawlai pyrshah ïa ka Sawmer SC ha ka por 3 baje nohphaisngi, ha SSA Stadium, Polo.