Ka mat kaba lah ïakren bad kaba lah khluid ka long ka jingkren jong u MLA ka Congress u Saleng A Sangma uba lah rah ïa ka mat hapoh Ïingdorbar Thaw Aiñ ba dang shudep shen ha kaba u kyntu ïa ka sorkar ban weng kam noh ïa ki pulit kiba sngaid, kiba la tymmen.
Kane ka mat ka sngew ïahab bha namar ïa ka kam pahara bad ban ai jingshngaiñ ne ka shongsuk shongsaiñ kumba long mynta ban leit tem da kiba lah tymmen kam long kaba suk namar ka kam ki pulit kadei ban long ïa kiba dang khlaiñ bad kiba dang jawan kaba mut ban tem ïa ki jingïakhih ne wat ban mareh.
Kane ka jingkren ka la mih ruh ha ki lad pathai khubor ba uwei na ki heh Pulit la kynnoh ba u la ktah kti ïa ki Nongïalam ki sengbhalang ha Pynursla bad kane ka pynmih ïa ka jingpuson ba la kham lah uba buaid ne uba la tymmen ne uba sngaid ban ai jingshngaiñ kaba dei ka mat kaba kongsan bha ba ki heh Pulit ki la dei ban pyrkhat noh kham jngai ne ïohi jngai.
La ju ïohsngew ruh manla ka por ba ki don katto katne haba ïatyngkhuh bad ki jingïakhih hapdeng ki riew paidbah bad ki katto katne ki pulit ha ka por mynmied ka jingujor ka long ba ki don ki bym biang shuh ban ïapynbeit kam.
Lada katei ka jingkren u MLA kadei kaba shisha na ka liang ka tnat pulit kadei ban shim khia ban tehlakam lane ban syntiat ïa ki pulit jong ka, kiba dih kiad bad kiba pynsniew dur ïa ka tnat pulit bad kaba ktah ruh ïa ka Koit ka Khiah jong ki namar ki la don ruh kiba la khlad noh na ka jingdih kiad.
Katkum ka juk thymmai mynta ki la don bun ki teknologi kiba lah ban pynraikhoh ïa uba sngaid, ïa uba sniew lah ban pynbha bad ki lah ruh ban shim ïa ki lad kilan met bapher bapher kiba lah ban ïarap ïa ki, lah ruh ban pynrung kam da kiba dang kham samla kiba lah ban kiar na ka dih, hynrei namarba tang shu la buaid ka klumar lut ka kam ka jam bad lah ban ong ba kidei kitei kiba shait shem ba lada don kiba dih ha ka por kamram kan mih beit ka hura huri.
Lehse ka kynta treikam jong u pulit la kadei katno katno kynta u dei ban treikam beit katkum ka por la jong ne ban shong slem ha jaka treikam haba ka por treikam ka la kut.
Lehse lah ruh ban thaw ki lad ba un ïoh ka por khambun ban ïashong Kai bad ki khun ki kti ne ka kurim bad ban ïoh ruh ka lad ban leit sha ki jingïaseng ba un lait na katei ka kam dih kiad kaba ki don katto katne kiba ju ngat ha katei ka jingdih kiad kaba sniew jan manla ka sngi, kumta la sngew ïahab ban ai jingmut ïa ka tnat pulit ban long kiba peitngor bha ruh halor ka koit ka Khiah khnang ban ïarap ïa ki pulit na katei ka kam.
Kumba la ong utei u MLA napoh ka ka thaiñ Garo ka por ka la dei mynta wat ban buh pahara ha kum ki jaka kiba bun paid kum ki jaka ba long ñew ruh da ki pulit kiba dang biang ka rta, wat haba ong kumne kam mut satia ban kheiñ beiñ ïa ki pulit kiba long ha katei ka dur jong ka jinglong ka met ne ka kam kaba ki la shah teh kynjri hynrei ka la donkam ruh ïa ka tnat pulit ba kum ïa kitei pat ruh ki jait nongtrei kiba ka rta kam ïahab shuh ba kin dang leit pahara la kumno kumno ka la dei ka por ba kin shu treikam beit napoh ka ophis khnang ba ki kam kin long kiba ïaid beit ïaid ryntih.
Lah ban ong ruh ba ka jingong jong utei u MLA kan ym lah ruh ban ong ba u la shu kren ne kheiñ troiñ ïa ki pulit ka jylla, hynrei la sngewthuh ruh ba u la kren hadien ba u la lap ha ki katto katne ki jaka, bad ym lah ruh ban shu kynnoh ba baroh ki pulit ki dei kiba la noh ka rta, ne kiba pher ha ka jinglong ka bor met ne kiba dih kiad hynrei ki don ruh shisha kiba shakri bha ïa ka kam la ka long ha kano kano ka rukom kaba ki trei la kidei ban leit shajngai ne wat ha Shillong.
La sngewthuh ruh ba ka kam ba ki pulit ki ai ka jingshakri ne kaba ki trei kam dei satia eh than kaba suk hynrei kadei kaba kham eh haba ïanujor bad kiwei pat ki jaitkam.
