Hiar ki nongïalam ka UDP bad HSPDP sha Khliehriat ban ïalap elekshon ïa u kyrtong RDA Khliehriat Lber 31 : Ki nongïalam jong ka United Democratic party lem bad ki nongïalam ka Hill State People’s Democratic Party (HSPDP) hapoh ka lama jong ka Regional Democratic Alliance na ka bynta kane ka MP election, ha kane ka sngi Saitjaiñ ryngkat u kyrtong MP jong ki, Bah Robertjune Kharjahrin ki la hiar sha Khliehriat, East Jaiñtia Hills District ban ïalap election na ka bynta kane ka election MP ka ban sa long ha u bnai ïaïong. Na ka liang u MLA ka thaiñ, Bah Kyrmen Shylla haba kren ha kane ka jingïalang u la kyntu ïa ki nongkyrshan jong u da kaba ong ba kumba ki pynjop donburom ïa u ki elekshon MLA ba la dep ba kin kyrshan kumjuh ïa u kyrtong ka RDA u Bah Robertjune Kharjahrin uban ïa ai reng ha kane ka elekshon MP. Katba na ka liang u kyrtong, u Bah Robertjune u al ong ba ynda la jop u don shibun ka thong ban trei da kaba trei ryngkat ryngkat bad ki MLA kum ki jong u Bah Kyrmen Shylla na ka bynta ka roi ka par hapoh ka thaiñ ryngkat ka jingkyrshan lang u President ka Party, ki MLA bad MDC kiba don ha ka lama jong ka RDA. “Kaba donkam eh mynta ka dei ban ïatylli lang na ka bynta ka ri bad ka jaitbynriew namar ka Parliament ka lah ban ai ïa ka hok ban mane blei laitluid bad ka lah ban shim pat ïaka lada ka mon, ka lah ban ai ïa ka Sixth schedule ban ïada ïa ka khyndew ka shyiap bad ka lah ban shim noh ïa ka lada ngi bakla, to ngin ïa sngew khia lang na ka bynta ka jaitbynriew,” u la ong. U la ong ruh ba ka sorkar India ka ai shibun bah ki lad pynroi ïa ki shnong ki thaw u la kyntu ïa baroh ki paidbah ban shim khia ban leit sha ki jaka thep vote da kaba buh hakhmat eh ïa ka ishu jong ka Jaidbynriew bad ka imlang sahlang kaba ka RDA ka don ïa ka thong. Haba kren shaphang ka jingïakynnoh jingïakynthoh iwei ïa iwei utei u kyrtong jong ka RDA u la ong, “Kum ka jaitbynriew tipbriew tipblei nga sngew ban ong ba ka long kaba sang ban shu ïakynnoh bad kynthoh klumar da kumne da kumtai, to ngin ïa treilang ban ïoh ïa ka synshar kahdar kaba khuid bad ai ba ngin sdang ïa kane na lade hi da ki kam ba ngi long kiba khuid ba suba, don ki briew kiba sngew khuid haduh katta katta bad ki pyrshang ruh ban pynshisha ïa kata da kaba shu beiñ bad kynnoh ïa kiwei pat ba ki dei ki nongtuh, ki nongbamsap bad ki nongbam klop. Ki ong lada jied ïa ki kin wanrah ïa ka synshar khadar kaba khuid hynrei ka ktien kaba ki kren bad ki kam ba ki leh ka la dei lypa ka bym khuid naduh ba sdang, namar ban shu kynnoh ïa kiwei khlem ka sakhi satar khlem jingpynshisha ka long kaei kaei ka bym khuid naduh ba sdang, hato phi shaniah kum ïa kita? Ngi kum ka RDA ngi kular ban wanrah ïa ka synshar khadar kaba khuid ka long da kawei na ki kam kaba ngan leh lada nga jop kum u MP jong phi bad kata ka long ba ha man la ki district ngin buh ïa ki kynhun ba hakhmat eh da ki riew paidbah ki ban peit ïa ki MP skim jong nga bad nga pyntina ba kan nym don ka jingbakla hangno hangno ruh, ngam beiñ ngam kynnoh ngam kynthoh ïano ïano ruh, rangbah ba donburom kam dei ka burom ka akor ïa ngi kum ki rangbah ban shu kynnoh klumar to da ïa tyngkan ïa ka ktien ka thylliej namar ha kawei ka por para khasi khara para Hynñiewtrep ngi hap ban ieng lang ha kawei ka sngi ban ïada ïa ka ri bad ka jaitbynriew jong ngi” ong u bah Robertjune Kharjahrin. Utei u kyrtong u la kren ruh shaphang ka direct Funding kumba ïoh lem ki jylla kiba ha ki ri thor, kiba la lah ban pyntrei ïa ki kam pynroi ha ki shnong ki thaw jong ki, ki nongsynshar shnong ruh ki ïoh jingsiew, katba ka jylla Meghalaya pat kam pat shym la ïoh ïa kane ka direct funding, ki rangbah shnong bunsien ki hap ban pynlut pisa na pla ban pynïaid ïa ki kam ki jam hapoh shnong, u la ong ba lada u jop kum u MP un ïakren halor kane ka direct funding khnang ba ki shnong ki thaw kin ïoh ïa ka roi ka par bad ki rangbah shnong kin ïoh ïa ki jingsiew bapher bapher. U la pynpaw ruh ka jingsngew khia halor ka jingshah thombor ki nongrep ha ka dor ka mur, u la ong ba ki nongrep ki mad jingeh, ki donkam ïa ka jingïarap jong ka sorkar ban wanrah ïa kata ka minimum support price, u kular ruh ban ïakren halor ki jingeh jong ki nongtrei Asha, ki Aganwadi, ki nonghikai skul bad ki kiwei kiwei ki nongtrei kiba mad jingeh. U la kyrpad ïa ki paidbah ba kim dei ban don ka jingsngew thaiñ, sngew niam, sngew balang bad ong ba kim dei ban ïa pharia para ma ki. “Ngan burom ruh ïa baroh ki jingngeit, lada poi sha ka thong ngin ïakren bad ka sorkar India ba ki niam trai ri jong ngi, seng ki Seiñ Raij kin ïoh noh ïa ka minority status ha ka ri India, kum ka RDA ngi ieng halor ka nongrim ban ïada ïa ka jingmane Blei laitluid ha ka ri India, ngi la ïohi ïa ka jingshah thombor ki niam kristan kum ha Manipur, ha Assam bad kiwei kiwei ki jaka. “Ngi pyrshah ïa ka jingphah kren Hindi jubor, ïa ka jingpynbor ban pdiang tang ïa kawei ka niam, ka jingkhang ban bam doh masi bad kiwei kiwei ki kyndon kiba ngim sngew ïahap, nga kular ban ieng ban ïada ïa ka riti ka dustur bad jinglong kyrpang ka ri bad jaitbyniew” u la pynpaw ruh ka jingsngew khia ba ha kine ki sngi ki la don ki kynhun kiba la sdang mutdur ban pynduh pyndam ïa ki riti ki dustur. U la ong ruh ba lada u poi sha ka thong kum u MP, un kren halor ka mat ban ïada ïa ki nongtih mar pohkhyndew, ban long trai halor ka khydew ka shyiap ban ïasaid ruh ban weng noh ïa ka MMDR Act na ka jylla Meghalaya ban pyntikna ba kum kine ki aiñ kiba ïatyngkhuh ïa ka jinglong trai halor ka khyndw ka shyiap dei ban pynbeit noh ïa kata ka jingeh.