Shillong, Lber 31: Ki ar kynhun ba kynthup ïa ka Laitjem CC bad ka Lumpaia Avengers CC ki la khur jingjop na ki jingïakhun ba la long hynnin ka Sngi Saitjaiñ jong ka lympung 3rd District League T20 Cricket Tournament 2024 ba la pynïaid da ka East Khasi Hills Cricket Association.
Ka jingïakhun kaba nyngkong ka la long hapdeng ka Cricket Smit CC pyrshah ïa ka Laitjem CC. Ha kane ka jingïakhun ka Laitjem ka la jop suk da 8 wicket.
Haba phai sha ka jingïalehkai, ïa ka toss la jop da ka Laitjem CC bad jied ban bol nyngkong, bad haba ka Cricket Smit CC ka la shimti ïa ka pali tied nyngkong ka la ïoh ban buh thong 120 ron haduh kaba kut jong ka 20 over bad la buh bad hap 8 ngut ki wicket.
U Elbrenroy Mawthoh u la lah ban ïalehkai bha napdeng ki rangtied da kaba khyrwit 60 ron naki 60 bol. Katba u Manchester Pathaw, rangkawangbol ka liang pyrshah u la ïoh ban khur 3/15 naki 4 Over.
Haba shimti ïa ka pali tied, ka Laitjem CC ka la lah ban tied tam da 121 ron, hap tang 2 naki 17.1 Over.
U Raymond Thabah rangkawangbol ka liang pyrshah u la ïoh ban khur 1/30 naki 3 over hynrei kam pat shym la biang ban pyllait ïa ka kynhun na ka namrem.
U Poilangson Thawmuit u la khyrwit haduh 63 ron naki 56 bol kaba la ïarap ïa ka Laitjem CC ban khur ïa ka jingjop da 8 wicket bad ha kajuh ka por ban khur syndon ïa ka khusnam Player of the Match.
Haba phai pat sha ka jingïalehkai kaba ar, ka Lumpaia Avengers CC ka la khur jingjop hadien ba ka la pynliem noh ïa ka Thynroit CC da 6 wicket.
Ka jingïakhun ka la sdang ha kaba ka Thynroit CC ka la jied ban tied nyngkong hadien ba jop ïa ka toss. Kane ka kynhun ka la ïoh ban kynjoh tang 75 ron shuwa ba baroh 10 ngut kin shah pynkhyllem tang hadien 17 Over namar ka jingtbit ki rangkawangbol ka liang pyrshah.
Dei tang u Darikupar Warjri u ba la ïohlad ban kynjoh sha ka phew ron na bynta ka kynhun, kata da 12 ron naki 8 bol. U Bryan Mac Millan Marbañiang u la long u namtam napdeng ki rangkawangbol ka Lumpaia Avengers da kaba khur haduh 4/14 naki 3 Over.
Haba dei sa ka pali tied jong ka Lumpaia Avengers, kane ka kynhun ka donkam tang 9.4 Over ban kynjoh 77 ron, hap 4 ngut ban khur ïa ka jingjop da 6 wicket.
U Ralphy Diengdoh u la ïoh ban tied 30 ron naki 18 bol na bynta ka kynhun, hynrei ïa ka nam Player of the Match la khur da u Bryan Mac Millan Marbañiang u ba la seisoh ha ka bol ban khur haduh 4 wicket.
