Shikhung ki jingdawa pynsngew ka Synjuk ki Rangbah shnong Ri-Bhoi sha ka Myntri ban pynbit pynbiang ïa ka koit ka khiah ha Ri Bhoi

Nongpoh, Nohprah 02: Ka Synjuk ki Rangbah Shnong Ri-Bhoi District mynta ka sngi kala shong da ka jingïalang ba kyrpang ryngkat shi khung ki jingdawa hakhmat Myntri ka tnad ka koit ka khiah ka jylla ka Kong Ampareen Lyngdoh ban pynbit pynbiang ïaka koit ka khiah ha Ri-Bhoi khamtam ba ki paidbah kin ioh ka jingshakri bad ka jingsumar ba janai
Kitei ki mat ba hakhmat ba ka Synjuk kala buh hakhmat ka Myntri ka tnad ka koit ka khiah ki kynthup ban pyntreikam noh ïaka Maternity and Child Health Hospital ha Umran Parila, ka Emergency and Trauma Center ha Civil Hospital Nongpoh, ban pyntreikam noh ïaka Minor Operation Theatre ha Bhoirymbong CHC, ban buh ruh kawei ka jaka sumar bad syllok ïa ki samla bala ngop haki jingdih buaid, ban kyntiew kyrdan ïaki jaka sumar kiba don haka district bad kiwei kiwei.
Ha katei ka jingïalang bala long ha Conference Hall jong ka DRDA la don lang ruh da u Bah Mayral Born Syiem Chairman ka State Health Advisory Board ba dei ruh u MLA ka Nongpoh, Arpit Upadhyay Deputy Commissioner ka Ri-Bhoi, Raja Brahma Project Director ka DRDA, ka Dr TS Momin DMHO ka Ri-Bhoi, Bah BB Makdoh Chairman ka Synjuk ki Rangbah Shnong, Bah PB Sylliang Secretary bad kiwei kiwei ki ophisar lem bad ki Rangbah Shnong kiba la wan ban mihkhmat naki jaka bapher bapher.
Ha katei ka sngi naka liang ka Synjuk ki Rangbah Shnong kala ioh ruh ban ai da ka dorkhas hakhmat ka Myntri ban buddien ïa kitei ki kam kiba ka Synjuk kala buh hakhmat ban pynurlong noh.
Haba kren sha ki lad pathai khubor naka liang u Bah Mayral Born Syiem Chairman ka State Health Advisory Board u la ong ba katei ka jingïalang kala long kaba seisoh hadien bala ioh ban ïakren shibun ki mat kiba ïadei kumno ban kyntiew ïaka tnad ka koit ka khiah khamtam ka jingshakri ban ai sha ki paidbah bala ioh ruh ban pynsngew hakhmat ka Myntri.
Kum u MLA u la ai khublei ruh ïaka Synjuk ki Rangbah Shnong ha Ri-Bhoi kaba la shim ïaka sienjam ban shimkhia ha kaba ïadei ban kyntiew bad ban nang pynbha ïaka tnad ka koit ka khiah ha Ri-Bhoi, ban kyntiew kyrdan ïaki Sub Center, ki PHC sha ki CHC bad ban nang pynjanai ki lad jingsumar haki CHC bad khamtam ban pyntreikam noh katto katne tylli ki project ba dang sahteng haduh mynta haka district kum ka MCH Hospital kaba don ha Umran Parila, ka Trauma Center bad ban buh ruh ïa kawei ka jaka sumar bad syllok jong ka sorkar ïa ki samla kiba la ngop haki jingdih buaid (Government Rehabilitation Center) ha kaba kum ka tnad ka koit ka khiah hapoh ka jingïalam jong ka kong Ampareen Lyngdoh kum ka Myntri kila pynpaw ka jingsngewnguh ïaka Synjuk bala pynsngew ïaki mat ba kongsan bad khamtam ban pynthikna ban buddien ïa kitei ki kam kiba ka synjuk kala pynsngew ba ki dei ban urlong haka district.
Naka liang u Bah PB Sylliang kum u Secretary ka Synjuk ki Rangbah Shnong u la ong ba kum ka Synjuk ka pynpaw ka jingsngewkmen kaba khraw hadien bala ioh ban ïakynduh kyrpang bad ka Myntri ka koit ka khiah khamtam bala ioh ruh ban pynsngew ïa shibun ki mat ba kongsan ba donkam ban kyntiew bad ban nang pynjanai ïaka jingshakri haka liang ka koit ka khiah ha baroh ki liang khamtam ban pynurlong noh ïa kiba bun ki project ba sahteng haka district namar ki paidbah ki shem jingeh ban leit sha kiwei kiwei ki jaka sumar ba kham jngai ha kaba naka liang ka Myntri kala kular ban shimkhia bad ban nang buddien ïa kitei ki kam nalor ka jingpynkhlaiñ shuh shuh ïaki Village Health Committee haki shnong, u la bynrap.
Nalor kitei ki mat ban dang pynkhlaiñ bad pynbha ïaka jingshakri haka tnad ka koit ka khiah naka liang ka Synjuk kala pynsngew ruh bala donkam eh ban don noh kawei ka jaka sumar bad syllok jong ka sorkar ïa kito ki samla kiba la ngop haki jingdih buaid, namar kumba long mynta ki don tang ki jaka sumar jong ki riew shimet kiba bun naki longing ba duk kim lah ban leit buh bad phah sumar namarkata ka sorkar kala dei ban phaikhmat ban buh ïa kawei ka Government Rehabilitation Center ha ka thaiñ Ri-Bhoi, ba shen ka Synjuk kan sa leit ruh ban ïakynduh ïa u Myntri ka tnad Social Welfare ban ïakren halor katei ka kam, u la bynrap.