Nongpoh, Nohprah 01: Kum shi bynta ban ïa snoh kti lang ha satlak ka pyrthei halor ka sngi kyrpang jong kito kiba don ka jingduna ha ka dkhot met, ka Association of Person with Disability, Ri Bhoi District mynta ka sngi ka la rakhe ïa kane ka sngi kyrpang da kaba pynlong da ki prokam bapher bapher ha Ri Bhoi District.
Ïa kane ka jingrakhe ïa ka sngi kyrpang kito kiba don ka jingduna ha ka dkhot met ba la tip kum ka ‘World Disable Day’ la pynlong ha ka Shnong Sonidan ha Ri-Bhoi District ba la wan ban shim bynta da kito kiba don ka jingduna ha ka dkhot met bad ruh ki kmie ki kpa ban ai mynsiem ïa la ki khun ba kin ioh ban lehkmen ha kane ka sngi kyrpang jongki.
U General Secretary ka FKJGP, North Khasi Hills District Unit, u Bah Shanlang Diengdoh u la leit ban shim bynta kum u kongsan ban ïa lehkmen ba kine ki ba don ka jingduna ha ka dkhot met ha ka jingdon ryngkat ka president, ka Kong Bluetisha Nongbet lem bad kiwei kiwei ki dkhot jong kane ka Association lane ka kynhun jong kito kiba don jingduna ha ka dkhot met na Ri Bhoi District.
Ha kane ka sngi, ka Association of Person with Disability, Ri Bhoi District ka la pynlong ruh da ki prokram bapher bapher kum ka jingïakop shad, kop rwai bad kiwei kiwei ki prokram ban ai mynsiem ïa kito kiba don ka jingdunaha ka dkhot met, ba kim dei ban don ka jingsngewpher ia lade bad kiwei pat kiba biang ha ka dkhot met.
Haba kren ruh ha kane ka sngi, na ka liang ka Kong Bluetisha Nongbet kum ka nongïalam ka kynhun ka la pynpaw halor shibun ki jingeh ba kum kita ki kynhun ba don jingduna ha ka dkhot met ki ïa kynduh ha ka jingim bad kum ka nongïalam ka la pynpaw ruh ba ka sorkar jylla ka la dei ban phai khmat kyrpang sha ki, ha kaba maki ruh ki dei ban ioh ïa ka hok kumba long lem kiwei kiwei kiba biang ha ka dhot met.
U General Secretary ka FKJGP, North Khasi Hills District Unit, u Bah Shanlang Diengdoh, haba kren ruh ha kane ka sngi, u la ai ka jingïaroh kaba khraw ïa kane ka kynhun, namar wat la ki don hapdeng ki jingduna ka dkhot met, hynrei ki shym la riej ban tip kyrpang ïa kata ka sngi kyrpang jongki da kaba pynlong ïa kane ka jingrakhe ïa ka sngi kyrpang jongki kumba la rakhe ha satlak ka pyrthei.
Kum u nongïalam seng bhalang na Ri-Bhoi, hadien ba la ioh sngew ïa kiba bun ki jingeh jong kitei ki paradoh ki parasnam kiba don ka jingduna ha ka dkhot met, u Bah Shanlang Diengdoh u la kyntu ruh naduh ki MDC, ki MLA bad ka sorkar jylla ba la dei ka por ruh ba kin phai khmat kyrpang sha kine ki paradoh ki parasnam kiba don ka jingduna ha ka dkhot met, namar kum kita ki nongshong shnong ka jylla wat la ki don ka jingduna ha ka dkhot met bad ki donkam pat ban kyrshan ka sorkar khnang ba kin lah ban im ban long kumba long lem kiwei kiwei kiba biang ha ka dkhot met, u la bynrap.
