Kumba 200 ngut ïoh jingsumar ei ki riew paidbah na ka Medical Camp ka KSU Laban Circle

Shillong Nohprah 02: Ka Khasi Students’ Union Laban Circle mynta ka sngi Saitjaiñ ka la pynlong ïa ka Free Medical Camp ne jingai jingsumar ei ha Kynjat Phutbol, ha kaba la ai jingsumar kumba arspah ngut ki briew kiba kynthup ïa ki khyllung, longkmie bad ki rangbah.
Ki doktor kiba ïa don ryngkat ha kane ka sngi ki kynthup ïa i Dr. L. Rynjah na Laban Dispensary, Dr. B.R. Garod na Lumparing UPHC, Dr. K. Nongbri (Pediatrics) na Children Hospital, Dr. A. Dkhar (ENT) na Robert Hospital, Dr. T. Syngkon bad Dr. A. Lyngdoh (Dentist) na Titanium Dental Health Care bad ki doktor khmat napoh Bansara Eye Clinic.
Ha kane ka sngi la don ryngkat lang ruh ki Lab Assistant na ka Dr. Lal Path Labs kiba la ïarap ban test shini (diabetes), cholesterol, thyroid, uric acid bad kiwei kiwei ki test kiba ki paidbah ki donkam.
Ka Seng ka pynpaw ka jingsngewnguh kaba khraw ïa baroh ki Doktor, ki Nurse, ASHA, Pharmacist, Lab Technician, ANM, DEO kiba la ïadon ryngkat ha kane ka sngi ban ai ïa ka jingshakri kaba pura sha ki paidbah ban ïoh ïa ka koit ka khiah.