Shi bynta ka Byrnihat ka hap lang sha Assam ngin ïatreilang ban pynkhuid ïa ka lyer: Himanta

Shillong, Lber, 28: U Myntri Rangbah ka Jylla Assam Himanta Biswa Sarma ha ka sngi Thohdieng u la ai ka jingkular ban ïatreilang bad ka sorkar Meghalaya na ka bynta ban pynkhuid ïa ka lyer jaboh ha ka shnong Byrnihat.
Ka shnong Byrnihat ka la ïoh nam kum ka shnong kaba jaboh tam na ka daw ka jingmih ka tdem jaboh na ki karkhana.
“Shi bynta jong ka Byrnihat, kumba phi tip, ka hap sha Assam bad shi bynta ka hap sha Meghalaya bad khlempep ngin hap ban don lang ïa kajuh ka jingkitkhlieh. Ngan ïatreilang bad ka Sorkar Meghalaya ban ïohi ba ka jingjaboh jong ka lyer ka dei ban duna,” ong u Sarma haba ïakren bad ki lad pathai khubor hadien ba la kut ka passing out parade kaba la long ha North Eastern Police Academy (NEPA).
Ha ka 13 tarik mynta u bnai, u Myntri Rangbah ka jylla u Conrad K Sangma u la kular ha Iingdorbar Thawaiñ ka Jylla ba pynlong da ka jingjurip lang hapdeng ka Meghalaya bad ka Assam khnang ba ïakren kumno ban pynduna ïa ka jingpynmih lyer jaboh na ki karkhana kiba don ha Byrnihat.