Mawkyrwat, Jymmang 20: U MLA jong ka Mawkyrwat Constituency Renikton Lyngdoh Tongkhar u la leit jurip ïa ka Maharam Government Higher Secondary, Mawkyrwat na ka bynta ban plie noh sa ïa ka Art Stream kaba dei ha ka por mynstep bad mynsngi.
Ka Maharam Government Higher Secondary, Mawkyrwat ka dei ka shlem ai jinghikai ïa ki khynnah bad ki samla pule kumba ka long baka dang don tang ïa ka Science Stream. Kumta khnang ba kiwei de ki samla pule kin ïoh ban rung klas kum ki nongpynïaid skul ryngkat na ka jingbhah jong ka sorkar ha kine ki sngi kan sa plie noh sa ïa ka Arts Stream.
Ha ka jingleit jurip jong u MLA ka Mawkyrwat, u bah Renikton Lyngdoh Tongkhar u la lap ba ka jingtei Maharam Government Higher Secondary School, Mawkyrwat ki dang biang pura ki kamra pynlong klas namar ba ki kamra ba la ju pyndonkam da ka JNV ïa mynta ki la lait bad long thylli, kumta ka la long kaba biang pura ban buh noh sa ïa ka Arts Stream ha kane ka skul pule.
U MLA u la ong ba ka long ka jingkyrkhu kaba khraw ïa ki khun samla jong ka distrik namar la lah ban pynlong klas ruh ha ka por mynstep khamtam kiba bylla mynsngi bad u la ong ruh ba kam don kano kano ka jingsngewduh mynsiem namar kiba kwah ban bteng ïa ki jingpule kin sa ïoh ka lad ba paka ban pyndep ïa ki jingpule.
Kiwei de kiba la ïa donlang ki long u bah D.G. Nongsiej, Principal jong ka Maharam Government Higher Secondary School, Mawkyrwat, u bah I. Lawrynniang, MCS, Block Development Officer, ka Mawkyrwat C&RD Block lem bad kiwei de.
