Shillong, Jymmang 20: Ka khubor ba la ïoh na ki pulit la ïathuh ba u Bah Winson Hynniewta da ka ktien u la ïathuh ba ha ka janmied jong ka 17 tarik mynta u bnai, arngut ki runar bym lah ban ithuh ki la lute ka pisa jong u kaba T. 8,000/- najan Apollo Hospital, Laitumkhrah, Shillong.
Ha kawei pat ka jingjia ki pulit ki la ïathuh ba u Lakhbir Singh u la phah ka jingujor ba ha ka 16 tarik mynta u bnai ha ka por 8 baje janmied uwei u Baldip Singh ha ryngkatlang bad arngut ki khun ki la ktah kti ïa u bad ïa uwei uba kyrteng u Suraj Kumar Valmiki ha Anjalee Parking Lot, Shillong bad u la byrngem ban pynduhkam ïa u na ka kam casual worker ha Station cell, ha kaba u Baldip Singh u la long u supervisor. Une uba la ujor u la pyntip ruh ba u Baldip Singh u la shim ka pisa kumba T. 4,000/-.
Ha kawei pat ka jingjia ki pulit ki la ïathuh ba u Bah Ricky Evans Lyngdoh u la phah ka jingujor ba ha ka 18 tarik mynta u bnai ha ka por 11.15 baje mynstep, u la tip ba ki paidbah kumba 100 ngut tam ki la bat ïa uwei uba kyrteng u Amar Balmiki ha Long Range, Thembasuk, Madanrting, Shillong, da kaba kynnoh ba u la shim pisa na ki briew kumba 300 ngut ki briew ha East Khasi Hills, da kaba kular ban pynïoh kam ha ka kam shipai, bad hadien pat la sngewthuh ba ki la shah thok. Kham hadien pat na ka liang ki pulit ki la pyllait noh ïa utei u briew bad la bat pat ïa uwei uba kyrteng u Sujan Sharma.
Shuh shuh ha kawei pat ka jingjia ki pulit ki la ïathuh ba kawei ka longkmie na ka shnong Umdohlun (SWKH) ka la phah ka jingujor ba ha ka 10 tarik mynta u bnai, arngut ki nongshong shnong jong kane ka shnong bad kiwei pat ki 5 ngut ki la tuh ïa ki artylli ki masi napoh ka jaka sah jong ki.
Ka khubor jong ki pulit ka ïathuh ruh ba u Osborn Samuel u la phah ka jingujor ba ha ka 19 tarik mynta u bnai ha ka por 2 baje mynstep, ki runar bym lah ban ithuh ki la prong hapoh ka ïing jong u kaba ha Kusimkolgre-A kaba dang hab ha Williamnagar PS (EGH) bad ki la tuh ïa ka thuk thuk jong u bad kiwei kiwei ki tiar.
Shuh shuh ha kawei pat ka jingjia u Goera B Marak u la phah ka jingujor ba ha ka 16 tarik mynta u bnai ha ka por 1 baje mynstep, u la lap ba ka kali jong u kaba don u nombar AS-01AB-7420 u la shem ba ka la jah na ka thaiñ Anogre (WGH).
Shuh shuh ki pulit ki la ïathuh ba u Bipul Paul u la phah ka jingujor ba ha ka 18 tarik mynta u bnai ha ka por 1.30 baje mynstep, ki runar bym lah ban ithuh ki la tuh ïa ka thuk thuk jong u kaba don u nombar ML-08G-8943 na Hawakhana, Tura (WGH).
