Shillong, Jymmang 20: Ka Meghalaya Basin Development Agency (MBDA) bad ka Meghalaya Basin Management Agency (MBMA) ki la kyntait ïa ki jingshah kynnoh halor ka jingshah pan da ka RTI kaba la ong ba la pyntreikam da ki kyndon bad ki rukom treikam haba pyntreikam ïa ka Cluster Development Program (CDP) ha ka jylla.
Katkum ka jingkren bad ïathuh da ka MBDA bad MBMA ki la ong, “Na ka liang uba pan ne wad ïa ka RTI la batai bakla halor ki jingtip ba la ai hapoh ka jubab ka RTI. Baroh ki jingpyntip haba ïadei bad ka CDP ka la don ha ki rynsan jong ki paidbah kumba la pyntreikam ïa baroh ki program kiba la pyntreikam da ka MBMA bad MBDA.”
Ka la kdew ruh ba kane ka jingpan ïa ka RTI kadei kaba la bun bha bad ba ka don kumba 340 tylli ki jingkylli. “Kiba bun na ki jingtip ba la pan ki la long tang kum ki jingkylli bad kiba khlem buh ha ka record jong ka seng bad kumta ym lah ban ai jingtip,” la bynrap.
“Ka jinglum ïa ki jingtip kaba pynkynriah ïa ki tyllong khubor kiba don bad kane ka office ka ktah ïa ki jingtreikam jong ka kiba manla ka sngi, namar kata kane ka khring ïa ki kyndon Section 7(9) jong ka RTI Act, 2005, kaba la ong, “Ïa ka jingtip dei ban ai ha kata ka rukom kaba la pan tat lada ka ktah ïa ki tyllong jong ka public authority ne na ka bynta ki lad jingïada ne pynneh pynsah kiba dei katkum ki kaiphod ha ki jingkylli.” Ïa kane kajuh la dep ban pynshai sha ba pan RTI kaba dei katkum ka jubab kaba la pan,” ong ka jingthoh.
Ka la ong ba ka Cluster Development Program (CDP) haba ïadei bad u shynrai Lakadong kadei ka prokram jong ka sorkar pdeng kaba la sdang ban pyntreikam ha Meghalaya ban wanrah ka jingkylla ha ka jingim jong ki nongrep shynrai jong ka shnong Lakadong.
Ïa ka CDP la pynwandur ha kata ka rukom ban aibor ha kaba ïadei bad kam rep khnang ban lah ruh ban kyntiew halor ka ïew ka hat nalor kiwei kiwei pat ki jingïarap, kiba ïadei bad ki kam pynmih ïa ki mar rep.
Lyngba ka jingpyrshang jong ka sorkar la jied ïa ka West Jaiñtia Hills kum kawei na ki 12 tylli ki pilot cluster hapoh ka CDP na baroh kawei ka ri. Ka CDP kadei kaba la bei pisa da ka National Horticulture Board (NHB) bad namar kata donkam ban bud ïa ki kyndon jong ka scheme ba la pynmih da ka NHB.
“Baroh ki kyndon ba la buh bad ki rukom treikam la bud bha bad la hap shim ruh ki jingmynjur ha shwa ban shim ïa kino kino ki project kiba ïadei bad kane ka kam. Baroh baroh ki jingtip ba ïadei bad kane ka project, kynthup ïa ka annual report bad ka third-party audit report, kadei kaba la don hapoh ka website (www.mbma.org.in) na ka bynta ban khmih ïa baroh ki briew,” la bynrap.
Ka Meghalaya State Agriculture Marketing Board (MSAMB) ka la thung ia ka Cluster Development Agency (CDA) bad Meghalaya Basin Management Agency (MBMA) kaba dei ka Implementing Agency (IA).
Haba pynpaw ïa ki jingjop hapoh kane ka program, la ïathuh ba palat 2004 ngut ki nongrep ki la ïoh ki jingmyntoi, bad kumba 15 packhouse jong u shynrai ba 30 metric ton bad kumba 12 tylli ki custom hiring centre la dep ban buh nalor ki 7 tylli ki kali kiba kit ïa une u mar rep.
La ïathuh ruh ba ka jingbuh ïa ka quality control lab ka dei ka kam kaba dang ïaid bad ka la don ruh ka jingïasoi MoU bad ka National Institute of Plant Health Management (NIPHM), Hyderabad na ka bynta ka jingdonkam ka jingkyrshan ha kaba ïadei bad ka capacity building, bad ka jingbuh ïa ki biocontrol lab, plant health clinic bad kiwei kiwei.
Ha kajuh ka por na ka liang ka MBDA bad MBMA ki la ong ba ki angud ban trei na ka bynta ka bha ka miat jong ki nongrep ha ka jylla bad ha kaba mynta la ïoh jingithuh ïa ka jingdonkam ban wanrah ki kam pynroi lyngba ki agency bad ki agency kiba paw ha ka pyrthei kum ka World Bank, IFAD, JICA, ADB bad kiwei. Ka jingïadon bynta lang bad kine ki agency ka long kaba donkam na ka bynta ka bha ka miat ki nongrep.
