Shillong, Jymmang, 20: Ka Martin Luther Christian University (MLCU) ka la pynlong ïa ka Intercollegiate cultural festival kaba shisien shisnem, ka ba la ai kyrteng da ka Fun-O-Rama 2025, ha kaba ha kane ka prokram ka la khring ïa kiba bun ki samla pule na ki jaka pule ka nongbah Shillong. Ïa kane ka prokram ba la pynlong da ka Student Council, ka la don ka jingpyni ïa ki sap ki phong, ki jingpyni kiba dei ha ka pule ka puthi bad ka mynsiem ka ban ïatei ha ka pule puthi.
Haba batai halor ka Cosplay Competition, ha kaba Jasmine bad George na Shillong College ki la ïoh ïa ka jingjop kaba nyngkong, ba la pynbud pat sa Grace V. Sailo na J.D. Institute of Designing, Bangalore bad Rimika Wanniang na Synod College, Shillong kum ki runners-up. Kiwei pat kiba la ïoh ïa ki jingshah pynkup burom ki long u Pynshngain B. Lyngkhoi na MLCU, Shillong uba la ïoh ïa ka nam Best Performance, Iahunlang Kharmyndai bad Daryll Warjri na Shillong Commerce College, Shillong kiba la ïoh ban rah ïa ka khusnam Best Costume, bad Della Nongspung na Lady Keane College, Shillong ba la ïoh ïa ka Judge’s Choice award. Ha kane ka sngi ki la don ruh ki prokram bapher bapher kiba la khring ïa ki samla pule bad kiwei kiwei kiba la shah khot sngewbha.
Na ka liang u kongsan u Bah Rieward V. Warjri, retired IFS officer, u la ïaroh ïa kane ka skulbah ba ka la lah ban kyntiew ïa ka jingïalong kawei bad kumjuh ruh ban ïarap ban kyntiew ïa ki sap ki phong hapdeng ki samla pule.
Kane ka prokram Fun-O-Rama 3.0 la ïathuh ba ka la lah ban khring ïa ki samla pule na ki jaka pule bapher bapher lyngba ki prokram kiba kynthup ïa ki kolshor bad kiwei kiwei pat kiba la pynsah jingkynmaw bad kiba la wanrah ïa ki jingmyntoi ïa kiba bun ki samla pule.
