Baroh ki constituency ha Sor kidei ban ïoh ka pisa lyngba ka 15th Finance, ïathuh u Bah Tynsong

Shillong, Jymmang 20: U Symbud Myntri Rangbah ka jylla u ba khmih ïa ka tnat District Council Affairs (DCA) u Bah Prestone Tynsong ha ka sngi baar u la pyntip ba la ai bor ïa ka tnat Pynroi Sor ne urban affairs ba kan shim ïa ka rai ban pynthikna ba ki constituency kiba hab ha ki district council bad kiba dang hab hapoh ki thaiñ sor ki dei ban lah ban pyntreikam ïa ki Tied bad Untied grant kiba la mang hapoh ka 15th Finance Commission.
Haba kren sha ki lad pathai khubor u Bah Tynsong u la ong ba ïa kane ka rai la shim ha ka jingïalang jong baroh ki 3 tylli ki autonomous district councils (ADCs) – ba kynthup ïa ka KHADC, JHADC bad GHADC na ka daw ki jingeh ba la mad da ki constituency kiba hab ha ki thaiñ sor.
“Ngi la rai ban aibor ha ka tnat urban affairs ban shim ïa ka rai kaba lah ban leh ha kaba ïadei bad ki constituency kiba hab ha ki jaka sor ba kin lah ban ïoh ïa ki Tied ne Untied fund kumba la mynjur da ka 15th Finance Commission,” u la pyntip kaba bynrap, “Nga la dep ong ïa u commissioner & secretary ka DCA ban ïa pynbeit bad baroh 3 tylli ki ADC bad nga thikna ban lah ban pyntreikam ïa kine ki juh ki scheme wat ha ki jaka kiba don ha sor naduh mynta.”
Haba kylli u Bah Tynsong u la ong, “Watla kam shym la don ka jingai ne buh por hynrei ngi la bthah ïa ki ba kin dang trei noh ïa ka kam kham kloi katba lah khnang ba kin lah ban shim bynta naba ka 15th Finance Commission kan kut ha u bnai Lber 2026. Mynta ngi sah satang khyndiat bnai bad kumta ngi la bthah ïa ki ba kin trei noh ia ka kam mardor khnang ba ki nongmihkhmat kiba la shah jied na ki constituency ha sor kin ïoh ïa kane ka scheme, ba la mynjur da ka 15th Finance Commssion (FC).”
U symbud Myntri Rangbah u la ïathuh ruh ba ki jingeh ki mih na ka daw jong ka portal kaba don la ka jong kaba la thaw na ka bynta ban pyntreikam ïa kine ki skhim.
“Kham mynshwa da ka jingbym don ka portal, ki la don ki skhim ba la mang na ka bynta ki ADC bad ki la ïoh ruh ka lad ban sam ïa ki skhim sha baroh ki 29 ngut ki MDC khlem da buh jingkylli la kidei na sor ne nongkyndong. Hynrei hadien ba la thaw ne pynmih ïa ka portal, kane kam pdiang satia ïa ki jaka kiba ym hab ha ki thaiñ nongkyndong. Kumta ngi la ïasyllok ïa kane ka kam mynta ka sngi,” u la bynrap.
Katkum ka jingïathuh jong u, ki la don haduh 5-6 tylli ki constituency ha baroh 3 tylli ki ADC, kiba hab ha ki thaiñ sor.