Shillong, Jymmang, 20: U Myntri ka tnat Jngohkai Pyrthei Bah Paul Lyngdoh ha ka sngi Baar u la ïathuh ba ka Sorkar ka la don ha ka bynta kaba khatduh ban jied ïa ki nongdie madan bad ki nongshong dukan harud surok na ka bynta pynkynriah ïa ki sha ki 200 tylli ki jaka shong die jingdie ha ka thaiñ Khyndai Lad.
Ha ka jingïakren bad ki lad pathai khubor u Bah Paul u ong ba ka tnat Pynroi Sor ka ladep khmih ïa ki jaka ban shong ki nongdie madan ha ka nongbah.
“Ka paw shai ba kan long kaba eh ïa ngi ban pynbiang ïa kiwei pat ki jaka shong die jingdie na ka bynta iwei pa iwei, u la ong.
“Kumta ngi la peit ban pynduna shwa ha Khyndailad. Ngi la poi mynta ha ka wat bakhatduh ha kaba ka tnat Pynroi Sor ka la jied ïa ki kyrteng jong ki nongdie madan namarba ki don kumba 200 ngut eiei. Ngi don ha ka khep kaba ngi lah ban ai jaka tang na ka bynta 200 katba ka la mih pat ka jingkam ba ki nongdie madan ki palat ïa kata. Tang shu dep ïa kata ngin sa ïaid shakhmat ban peit sa ïa kiwei kiwei ki jaka,” ula ong shuh shuh.
“Ngi la lah ban pyndep mynta ha kaba shna ïa ki duna na ka bynta ki nongdie madan namarba ki dang bun shuh shuh kiba kam ïalade kum ki nongdie madan ban ïa ka jingdon jong ki dukan ba ladep shna. Kata ka jingtreikam ka long ban pynthikna ba tang kiba dei hok shisha kin ïoh ïa ki dukan ba ladep shna, kata ka la ïaid shakhmat,” ong shuh shuh u Bah Paul.
