Jowai, Lber 14 : Ka ophis jong u District Sports Officer, West Jaintia Hills District, Jowai kala pyntip shen kan sdang ïa ka jingïalehkai phutbol na ka bynta ki khynnah shynrang bad kynthei kaba la tip kum ka “Chief Minister U-12 Open Football Tournament 2023”, naduh ka taïew ba khadduh jong une u bnai.
Ha kaba ïadei bad kane ka kyrpad ïa baroh ki Sports Club, ki School, ki Association bad kiwei de ki kynhun kiba hap hapoh ka West Jaiñtia Hills District ba kin wan ïashim bynta ha kane ka lympung mynta ka snem.
Na ka bynta ki snem jong ki khynnah ïalehkai kin long kiba kha naduh ka 01-06-2012 bad kim dei ban palat haduh ka 30-06-2014. Ha ka juh ka por kin wanrah lang kawei ka Passport size Photograph, Aadhaar Card, ka syrnod sngikha ba ithuh da ka Municipal Board / CHC / PHC.
Na ka bynta ka Entry form lah ban leit shim katkum ka jingpynbeit kiba long kumne harum na u ma Shngainlang Suting (Amlarem Block), ma Sailon Syngkrem (General Secretary ASSA, Amlarem Block), ma Rangbah Suchiang (Laskeiñ Block), ma Bhabok Sungoh (Namdong Block), ma Hoping Thubru (Namdong Block), ma Welborn Lyngdoh (Thadlaskein Block), ma Player Suna (Thadlaskeiñ Block).
La pyntip ba ïa ka tarik ban jurip ‘Screening’ ïa ki khynnah kan long kumne na ka bynta ka Amlarem Block ha ka 22 tarik u Lber, 2023 naduh ka por 2 baje janmiet shaneng ha ASSA Playground, Ladjaplem. Ha Laskeiñ Block haka 23 tarik u Lber, 2023 naduh ka por 2 baje janmiet shaneng ha Pamsna Playground. Ha Namdong Block – 24 tarik u Lber, 2023 naduh ka por 11 baje mynstep shaneng ha Madan Sari Playground. Ha Thadlaskeiñ Block haka 24 tarik u Lber, 2023 naduh ka por 2 baje janmiet shaneng ha Mukhla Raij Playground.
Ïa kane ka lympung yn pynlong shwa da ki Block Wise kiba jop na ki Block Level kin ïoh mihkhmat sha ka District Level bad kiba jop na ka District Level kin leit mihkhmat sha ka State Level.
