Bthah ka HC ban phah pahara 10 pyrton ki pulit CISF ban khanglad khaïi dewiong beaiñ

By Mawphor News Desk On Mar 14, 2023

Shillong, Lber 13 : Ka ïing bishar High Court jongka jylla ka la hukum ïa ka sorkar ban phah pahara 10 pyrton ki pulit Central Industrial Security Force (CISF) ban khanglad ïa ka jingkhaïi dewiong beaiñ ha ka jylla.
ïa kane ka hukum la pynmih hadien ba ka sorkar jylla ka la pynpaw ba donkam haduh 316 klur tyngka ka pisa na ka bynta ban tei ïa ki jaka sah jong ki 100 pyrton ki CRPF ki ban phah pahara ha ka jylla.
Ha ka hukum, ka ïing bishar ba la khlieh da u Chief Justice Sanjib Banerjee ka la ong, “Ka paw kumba shongnia bha ïa ka ïing bishar ban wanrah da 10 pyrton ki CISF ha ka jaka jong ki CRPF. Kane ka long namar, kumba la kdew da ka Sorkar Pdeng, ka CRPF ka treikam hapoh ka jingpynïaid jong ka Tnad Pulit ka Jylla katba ka CISF ka treikam laitluid”.
Halor ka jingkylli na ka ïing bishar la pyntip ba na ka bynta ka Sorkar Pdeng ba ka CISF ka dei kaba lah ban leh ïa ka kam talasi ïa ki kali kit mar.
“Haba pynshong nongrim ïa ka jingheh ka jaka ha Jylla bad don ruh ki jaka sha ki jaka kyndong ki bym don surok bad ka jingtih dewiong beaiñ bad khaïi tuh ka dang ïaid, 10 pyrton ki CISF kan biang eh ban talasi ïa ki kali bad ban tehlakam ïa ka jingkhaïi tuh ïa u dewiong” ong ka ïing bishar.
“Nalor ba ka CISF ka ïaid talasi ïa ki kali, khlem pep kan ïarap ruh ban tehlakam ïa ka jingkhaïi ïa ki mar khaïi tuh bad ban pynthikna ruh ba ki kali kin kit ïa ki mar kat kum ka jingkhia bala buh haba ïaid ha ki surok ka Jylla bad ki National Highway” ka la bynrap.
Ka ïing bishar ka la bthah ïa u Dr Mozika ban pynbeit ïa ki jingdonkam baroh ha kaban phah ïa ki 10 pyrton ki CISF sha ki jaka kiba donkam na ka bynta ban talasi bad tehlakam ïa ka jingkhaïi tuh ïa u dewiong ha ka Jylla.
“Kane ka lah ban nym shim por da ki snem namar ka Jylla kala pynkhreh ban sdang noh da ka jingtih marpoh khyndew da ka jingstad saian bad ban ai licence kat kum ka aiñ” kala ong.
Shuh shuh ka ïing bishar ka la bthah ruh ban don ka jingïamir jingmut bad u Justice Katakey na ka bynta ban pyndonkam ïa kine ki 10 pyrton ki pulit CISF .Ka jingwan rah ïa ki sha kane ka jylla ka long ruh da ka jingsiewdor tangba kane ka shong ruh ha ka jingïakren bad ïa pynbeit ka sorkar jylla bad ka sorkar pdeng.
Ka ïing bishar ka la buh ban bishar biang ia kane ka kam ha ka 20 tarik u Lber.