Ka Mukroh ka hap sha Assam: Himanta, Em Em.. ka hap sha Meghalaya: Prestone

Guwahati/Shillong: U Myntri Rangbah ka Assam, u HImanta Biswa Sarma, u la ong ba ka Shnong Mukroh kadei ka bynta jong ka Assam, namar ka hap hapoh ka West Karbi Anglong District.
Haba jubab ïa ka jingkylli jong u MLA ka BJP u Bidyasing Engleng, halor ka jingkylli mynta ka sngi hapoh ïingdorbar Thawaiñ, kaba la buh tangba kaba ym shym la kylli da ka ktien, u Sarma u la ong ba ka Mukroh ka hap hapoh u pud u sam jong ka Assam. U Emleng u la wanrah ïa kane ka jingkylli ha kaba u kwah tip la ka Mukroh ka hap ha Assam ne Meghalaya.
U Sarma, u la ong ruh ba ka jingïasiat kaba la jia ha ka 22 tarik u Naiwieng jong ka snem baladep, ha kaba 6 ngut ki briew ki la ïap, kadei kaba hap hapoh u pud jong ka Assam”, la ong u Sarma.
Ha Shillong pat, u Bah Prestone Tynsong, Symbud Myntri Rangbah uba peit ïa ka tnad pohïing, u Bah Prestone Tynsong, u la ong ba ka Mukroh kam dei satia kaba hap sha Assam, hynrei kadei ka bynta jong ka Meghalaya bad ka hap hapoh u pud u sam jong ka Meghalaya.
Haba ïakren bad ki nongthoh khubor kiba la pyntip ïa u halor kane ka jingkam u Myntri Rangbah ka Assam, u Bah Prestone u la ban biang da kaba ong, “Nga kren da kaba shai ba ka Mukroh ka hap ha Meghalaya bad ngam tip balei ba u Myntri Rangbah ka Assam u kren kumne”.
U la ong ruh ba ha ka jingshisha ka Meghalaya bad ka Assam ki dang thmu ban ïakren pynbeit noh ïa u pud u sam ha ka bynta kaba ar bad um lah peiphang balei ba u Myntri Rangbah ka Assam u kren kumne.
Ha kaba ïadei bad ka jingïakren pynbeit pud ha ka bynta kaba ar na ka bynta ki hynriew tylli ki jaka ba dang sah, u Myntri kam pohïing ka Meghalaya, u la ong ba shen ka sorkar kan sa thung ïa ki Regional Committee kumba la rai da ka sorkar kaba rim na ka bynta ban pynïaid shaphrang ïa kane ka jingpynbeit pud ha ka bynta kaba ar.