Haduh 47 klur mang shuh ka sorkar pdeng ban kyrshan ïa ka jylla ha por ba lyngshop mariang

Shillong, Lber 13 : Ka sorkar pdeng ka la mang shuh sa 47.326 klur tyngka na ka bynta ka Meghalaya lyngba ka National Disaster Response Fund (NDRF) ban kyrshan ïa ka jylla ha ka por ba don ki jingjïa lyngshop mariang.
Ka Meghalaya kadei kawei na ki san tylli ki jylla kiba la ïoh shuh ïa jingïarap kyrshan pisa lyngba ka NDRF hadien ba ka la shah ktah jur ha ka jingshlei um, ka jingtwa khyndew bad kiwei ki jingshah lyngshop mariang ha u 2022.
Dang shen ka High Level Committee hapoh ka jingïalam jong u Myntri Kampohiing ka Ri, u Amit Shah ka la mynjur ïa ka mang pisa kab a1,816.162 klur tyngka na ka bynta ki san tylli ki jylla.
Kane ka sienjam ba shim da ka sorkar pdeng hapoh ka jingïalam jong u Myntri Rangbahduh ka Ri, u Narendra Modi ka long ban ïarap ïa ki san tylli ki jylla kib amad ïa kum kitei ki jingshah shah lyngshop ha ki bor ka mariang.
Ki saw tylli kiwei pat ki jylla ki kynthup ïa ka Assam kaba ïoh 520.446 klur tyngka, ka Himachal Pradesh kaba ïoh 239.31 klur tyngka, ka Karnataka 941.04 klur tyngka bad ka Nagaland kaba ïoh 68.02 klur tyngka.
Katei ka jingmang shuh ka jingkyrshan pisa kadei nalor kaei kaba la mang da ka sorkar pdeng sha ki jylla ha ka State Disaster Response Fund (SDRF). Ha kane ka snem treikam 2022-23, ka sorkra pdeng ka la pyllait haduh 15,770.40 klur tyngka sha ki 25 tylli ki jylla ha ka SDRF bad 502.744 klur tyngka pat sha ki saw tylli ki jylla na ka NDRF.
Ka sorkar pdeng ka la dep ruh ban phah ïa ka kynhun jurip ne ka Inter-Ministerial Central Teams (IMCTs) sha kito ki jylla ba don ki jingjia shah lyngshop mariang hadien kitei ki jingjia khlem da ap shuh ïa ka kaiphod kaban wan na ka jylla.