Bynkylla ïa aiñ ïoh pateng ban ïoh bynta ki khun shynrang, dawa ka Maitshaphrang Movement

Shillong, Lber 13: U Convener jong ka Maitshaprang Movement u Bah Michael Syiem ha ka sngi Nyngkong u la dawa ba ka sorkar jylla ka dei ban pynsted noh ïa ka ka dei ban pynsted noh ha ka ban pynkylla thymmai ïa ki kyndon ka Meghalaya Succession to Self-acquired Property, Khasi and Jaintia Special Provision Act 1986.
Haba kren sha ki lad pathai khubor u Bah Michael u la ong ba ka jingnoh shiliang ka rukom bhah ïa ka jingdon jingem jong ki kmie ki kpa hapdeng ki khun shynrang bad ki kynthei ka la wanrah ïa ka jingkyrduh kam ki samla hapoh ka jylla bad kane ka plie lad ïa ki bar jylla ban wanrah ïa ka khaïi pateng hapoh ka jylla
U Bah Michael ula ïathuh ba hadien 20 snem naduh ba la seng ïa ka Maitshaphrang, ka la donkam ïa ka sorkar jylla ban pynlong aiñ noh ïa ka jingïasam ïa ka ïoh ka kot jong ka ïing ka sem hapdeng ki khun synrang bad kynthei.
“Kum ka kynhun ngi kwah ban ïoh jingkyrshan na baroh ki paidbah khamtam na rilum Khasi-Jaintia ban pynbor ïa ka sorkar ban wanrah jingkylla noh ïa ka aiñ Meghalaya Succession to Self-acquired Property, Khasi and Jaintia Special Provision Act 1986 namar kane kan wanrah ka jingïatylli hapdeng ki khun shynrang bad kynthei namar kane kan tei ïa ki ïing ki sem bad ïa ka jylla baroh kawei,” la ong u Bah Michael.
U bah Michael ula ong ba kane ka jingdawa ban pyntreikam ïa kane ka aiñ sam bynta sha ki khun shynrang ka long ban lait ruh na ka jingshah lehbeiñ ne knieh jubor ïa ka kamai nongkhynraw ki kmie ki kpa da ki kur.Ula ong ba lada wanrah ka jingkylla ïa ka Meghalaya Equitable Distribution of Self Acquired and Ancestral Property Act, kane ka aiñ lada ka lah urlong kan long ruh ka jingpynkupbor ïa ki khun shynrang ban khlaiñ ka tyrpeng ban kit ban bah ïa ka longïing longsem ynda ki la shongkha.
Shuh shuh ula ong ba ka jingbym ïoh bynta lang u khun shynrang ïa ka kamai nongkhynraw ki kmie ki kpa ka ka pynlong ïa ki ban ym sngewtrai ïa ka ïing ka sem bad wat ïa kamai kajih ruh haduh ba kan pynlong ïa uba na bar ban wan kamai leh trai khlieh ei sha kane ka jylla.