Shillong, Lber 14 : Ka jingïalehkai kaba nyngkong jong ka lympung U-15 Inter District Cricket Tournament 2023 ba pynïaid da ka Meghalaya Cricket Asscociation (MCA) ka la kut da ka jingïakhaid hapdeng ka Ri-Bhoi bad Shillong Cricket Association-A ha Umbuda, Ri-Bhoi, ha ka jingïalehkai ha ka sngi Ba ar.
Ha ka sngi ïalehkai kaba nyngkong, ka Ri-Bhoi kala shah pynkhyllem lut baroh ki wicket da kaba kamai 107 ha ka inning kaba nyngkong ha kaba ka SCA-A kaba la shim ka pali tied ka kamai 66 ron. Ka Ri-Bhoi kaba la tied biang ka kamai 135 ron khyllem baroh ki wicket bad ka thong na ka bynta ka SCA-A ban jop da 177 ron ha kane ka sngi ïalehkai kaba ar.
Ka SCA-A ka la sdang da kaba kamai ron da 49 ron hapdeng u Samelawan S Nongkseh (13) bad u Rudra S Rathor. Na ka jinghap wicket noh u Samelawan S Nongkseh, u Rathor u la kamai ron lang ryngkat u Krishiv Chaudhary da 58 ron ha ka jingduh noh ïa ki ar wicket.
Hynrei u Rathor u la shah pynkhyllem wicket noh da kaba kamai 47 ron. U Chaudhary u la bteng ban kamai ron hynrei u la duh noh ïa u paralok ba tied lang bad neh da kaba kamai 78 ron, ha kaba ka kynhun ka la shah pynkhyllem lut baroh ki wicket da kaba kamai 176 ron ha ki 48.3 over, da kaba ïaryngkat bad ka jingkamai ron ka Ri-Bhoi.
U Sanjay Sawkuta u la lah ban kawang bol bha da kaba khur haduh 6 wicket ai kamai 25 ron, katba u Gaurav Narleng u ïoh 2 wicket ai kamai 14 ron. U Sawkuta u kamai half-century na ka bynta ka Ri-Bhoi ha ka inning kaba ar, ha kaba u la ïoh ka nam kum u lahduh ha baroh ki jingïalehkai.
