Mawkyrwat, Lber 14 : Ka Rangmaw Sports Club ka la long kawei na ki kynhun ba lahduh hadien ba ka la jop da 7 wickets pyrshah ïa Domjyrti Sports Club ha lympung ïalehkai jong ka 5th Edition Super Division District Cricket League, 2023 ba la pynïaid da ka South West Khasi Hills District Cricket Association (SWKHDCA) ha Madan Motmeron, Jakrem, South West Khasi Hills District.
Haba phai ha ka jingïalehkai, ka Domjyrti SC ka la jop ïa ka toss bad ka la jied ban tied nyngkong ha kaba ka la kamai 109 runs bad hap noh 9 wickets na ka 20 overs. U ba tied bun ron jong ka Domjyrti SC, u dei u Superson Lyngdoh ha kaba u la ïalehkai bha bad ïoh 22 runs. Haba beh ïa ka thong, ka Rangmaw SC tang hapoh ka 17.2 overs bad hap noh 4 wickets bad ïoh pat haduh 114 run.
U bah Devension Lyngdoh jong ka Rangmaw Sports Club u la ïoh haduh 45 runs bad ïoh 4 wickets marwei bad rah syndon ïa ka nam u ‘rangïalehkai ba tbit bad ïoh ruh ïa ka nam u ‘rangïalehkai ba kynsai jong ka lympyng ha kaba u la ïoh khur haduh 238 runs bad ïoh 19 wickets ha baroh kawei ka jingïalehkai.
Nangta, u bah Wansynshar Nongsiej jong ka Mawkyrwat Sports Club u la ïoh ïa ka nam ba ïoh bun ron ha kaba u la tied haduh 264 ron ha baroh kawei ka jingïalehkai katba u bah Aristerfield Lyngdoh jong ka Rangmaw Sports Club u la ïoh ïa ka nam nongap ba-tbit ne Best Fielder hadien ba u la ïoh haduh 6 ki jingkem bol ba itynnad.
Ha ka sngi ban pynkut ïa ka 5th Edition Super Division District Cricket League, 2023 ba la pynïaid da ka South West Khasi Hills District Cricket Association (SWKHDCA) la wan ban pynhap pyrda da u bah Renikton Lyngdoh Tongkhar uba long u kongsan ha ryngkat ka jingsynranlang U bah Elevenson Wanniang kum u Symbud Kongsan, ha ryngkat ka jingïadonlang u President jong ka SWKHDCA, u bah Bantei Lyngdoh lem bad kiwei de.
