Shillong, Lber 14 : Hapdeng ka jingïaid lynti kaba jwat bad ki rai-eh rai-dam ba ki la ïakynduh, hynrei na ka jingjynsur mynsiem ban ïarap ha kaban kyntiew ïa ki nongïalehkai, ki saw ngut kiba dei shi paralok ki la lah ban pynurlong ïa ka jingthmu ha kaba ki la lah ruh ban plie syndon ïa ka madan ïalehkai phutbol ha Diengïong, Mawdiangdiang.
Ïa katei ka madan kaba dei ruh ka madan ïalehkai Futsal kaba nyngkong eh hapoh ka jylla Meghalaya kaba la siang da ki phlang plastik bad ka jingheh ka long 40x22m bad kaba la pynïeng ruh da ki jingshai ne ki floodlight ha baroh sawdong jong katei ka madan la bei tyngka da ki 4 ngut kiba la jer kyrteng ‘4 For All’.
Kine ki saw ngut shiparalok kiba la bei tyngka ha kaban pynurlong ïa katei ka madan, ki kynthup u Bah Dawanshan Kharbudon, Mebanshan Kharbudon, Ardentson Syngkon bad u Bah Nathaniel Kharbudon. Ïa kane ka madan la plie paidbah ha ka sngi Balang jong ka taïew ba lah dep da u Pastor R.R Cunville uba la long ruh kum u Kongsan, ha ka jingïadonlang u MDC ka Sohryngkam, u Bah Pynïaid Sing Syiem kum u symbud kongsan, Tbn T Mark, Kong Agnes Kharshiing, Bah Francis Kharshiing bad kiwei kiwei.
U Bah Wanshan Kharbudon uba dei uwei napdeng ki saw ngut kiba la pynurlong ïa kane ka madan u la ong ba ka jingthmu jong kane ka long ban plie lad plie lynti ïa ki paidbah naduh ki khynnah, ki samla haduh ki riew rangbah kiba ieid ïa ka jingïalehkai phutbol ba kin ïoh ka lad ban ïalehkai bad ban pyni ïa la ki jong ki sap.
U la ïathuh ruh ba ki la sdang ban shna ïa kane ka madan ha u Risaw 2022. “Ngi la sdang ban shna ïa kane ka madan ha ka taïew ba nyngkong jong u Risaw 2022 bad ïa kane ka madan yn aiwai ha kino kino ki riew shimet, ne ki club kiba kwah ban ïalehkai lane ban pynlong ïa ki lympung ïalehkai,” ong u Bah Wanshan Kharbudon.
Kane ka madan kadei kadei ka madan ïalehkai Futsal kaba kynthup ka 7-A-Side Futsal bad 5-A-Side Futsal.
