K a Seng Voice of the People Party (VPP) kadei ka Party kaba dang thymmai eh ha ka jylla Meghalaya, ha kaba la mih pyrthei ha ka snem 2021 hapoh ka jingïalam jong u Bah Ardent Miller Basaïawmoit, uba long u riewsaiñ pyrthei ba la ih bha. Ryngkat ka jingïasnoh ktilang ki rangbah kiba la ju don bad u ha ka Seng HSPDP ha ki snem baladep bad ka jingwan ïatreilang ki riewshemphang na NEHU na ki College, ka VPP ka la ïakhun ïa ka elekshon MLA 2023 ryngkat ba ka jingpyrta ban wanrah ka jingkylla sha ka jingsynshar kaba khuid ba suba.
Shuwa ka elekshon, kiba bun kim ai jingkyrmen eiei ïa kane ka Party namar ba ka dang thymmai bad khamtam eh ba ka leit sha u paidbah da ka jingieit bad ka jingïaleh pyrshah ïa ka jingsam pynbieit da ka pisa. Ha Meghalaya ban ong ban ïaleh elekshon khlem ka jingpynbieit pisa kumba ka la paw ha kine ki elekshon kiba ladep ka long kaba kiba bun hi kim ngeit satia.
Hynrei imat ki nongïalam ka VPP ki don ka jingngeit kaba skhem ba khlem ka bor jong ka pisa lah ban ban thied ïa u paidbah da ka jingieit. Naduh ba la seng ïa ka VPP, ki nongïalam ka Party ki la rung sha ki shnong ki thaw ban pyngngam ha ki paidbah ïa kane ka jinghikai kaba la sdang da u Bah Ardent ha ka snem 2010 lyngba ka Clean Politics Campaign. Kiba bun ki la ju kylli “Shano jah ka Clean Politics Campaign u Bah Ardent”?. Hynrei bun kim ïohi pat ba ha ka snem 2014 haba u Bah Ardent u la long u CEM ka KHADC, ka Clean Politics Campaign ka la treikam, haba u la wanrah ka jingtreikam kaba khuid ba suba hapoh ka Council. Nangta ka ïewduh kaba dei ka bynta ba kongsan jong ka Ri Khasi ruh ka la khuid ym tang ha ki madiah ne ki jaka ïadie ïathied, hynrei ka la khuid ruh ka rukom treikam, ha kaba ki paid Khasi ki la ïoh bun ki jingmyntoi. Dei namar kane ka daw ba ki nongïew ki da ieit thep mynsiem ïa u Bah Ardent haduh mynta.
Haba phai sha ka elekshon baladep, ka VPP ka la pynlyngngoh ngaiñ ïa baroh. Ym tang ïa ki paidbah hangne, hynrei wat ïa kito ki News Channel bad ki Company kiba leh ïa ka Exit Poll hadien ba ladep thepvote, namar baroh ki News Channel bad ki Company ki buh ïa ka VPP ba kan jop hapdeng 0 bad 1. Kiba bun ki ong ba ka VPP kan nym jop bad lada jop ruh lah ban jop tang u Bah Ardent ne u Bah Adelbert. Hynrei ka result kaba la mih ha ka 2 tarik u Lber 2023, ka la pynkyndit ïa kiba bun, haba ka VPP ka la jop ha 4 tylli ki Constituency bad ka la shu rem salit ha Mylliem. Ha kiwei kiwei ki Constituency ruh ka la leh bha.
Kane ka jingai jingkyrshan ki paidbah ïa ka VPP kiba bun ki ong ba kadei ka jingsngewtynnad bad ka jingshongshit jong ka jingrwai Prah ba la thaw da u Bah SF Mylliemngap. Hynrei ka jingkylla ki paidbah ban kyrshan ïa ka VPP kadei hadien ba ka Party ka la pynmih paidbah ïa ka Vision Document ne ka jingpruid lynti sha ka jingtreikam ba kham bha na ka bynta ka jylla bad khamtam hadien ba la pynmih ïa ka Manifesto ne ki mat treikam ïaleh elekshon. Ka daw ka long ba ka Manifesto jong ka VPP kadei kaba kham pher na kiwei pat ki Manifesto jong kiwei pat ki Party namar ba ka kham shai bad kham ïahap bha bad ka jingangnud ki paidbah.
Kawei pat kadei ka jinglah jong u Bah Ardent ban khring ïa ki paidbah sha ka jingïalang bad khamtam eh ban pynshai bad ban pynsngewthuh ïa ki paidbah halor ka jingdonkam ban ïoh ïa ka jingsynshar kaba khuid ba suba. Nangta ka jinglah jong u ban leit kylleng kylleng ki Constituency ban pynshai bad ïarap ïa ki kyrtong jong ka Seng. Shuh shuh ka jingangnud ban ïoh ïa ka jingkylla bad ban ïoh da u nongïalam uba lah ban shim rai bad uba shlur.
Kine ki daw ki la ïarap ïa ka VPP ban ïoh ïa ka jingkyrshan ki paidbah ha kaba wat lada ka pynïeng tang 18 ngut ki Kyrtong ruh, ka la jop pat 4 ngut. Mynta lei lei ki paidbah ki phaikhmat sha kane ka Party na ka bynta ka elekshon MDC ka ban long ha u snem 2024 bad bun ki la ong ba ka VPP kan jop bun bha ha kane ka elekshon sha Khasi Hills Autonomous District Council, kaba wat kiwei pat ki Political Party ruh ki kubur ïa kane.
Mynta ba ki 4 ngut ki MLA ka VPP ki la rai ban shong ha ka Liang Pyrshah bad kadei tang ma ka ka Seng Riewlum ban shong ha ka Liang Pyrshah, ka shong ha kine ki 4 ngut kaei ka jingtreikam jong ki, kiei ki mat ba kin rah ha kine ki shi snem haba ki don ha ka Liang Pyrshah bad kadei kane kaban pynneh bad pynrhem ïa u Prah haduh ban da poi ka elekshon ne wat ha ka elekshon MP ruh.
