Shillong, Naitung, 24: Ka Bharatiya Janata Party (BJP) ka la shim ïa ka rai ban khot noh shen ïa ki arngut ki MLA, kata, u Bah Sanbor Shullai bad ïa u Bah AL Hek na ka bynta ban pynkut noh ïa ki jingïakynad hapdeng jong ki.
U President jong ka BJP Meghalaya State Unit u Bah Ernest Mawrie ha ka jingïakren bad ki lad pathai khubor u la ong ba ka jingïalang jong ki nongkitkam kaba la long ha ka sngi Palei jong ka taiew baladep ka la shim ïa ka rai ban khot lang ïa kine ki arngut ki MLA khnang ban pynkut noh ïa ki jingïashrut lada ki don ïa kano kano ka jingïapher jingmut.
Ka BJP ka shim ïa kane ka rai hadien ba u Bah Sanbor Shullai ula dawa ban dei ban leh eiei pyrshah ïa u Bah AL Hek halor ka jingpyrshang ban shim kabu saiñpyrthei da kaba kren sha ki lad pathai khubor kaba la jia ha ka jingwan iuhkjat jong ka President Draupadi Murmu ha Meghalaya ha ka 6 tarik mynta u bnai.
La kynnoh ba u Bah Shullai u la pynthud ïa u Lamphang jong ka Ingdorbar Thawaiñ ka Jylla u Bah Metbah Lyngdoh kaba u dang ai jingkren halor ka jingshah leh beiñ jong ki riewlum.
Haba kyntait ba kam don kano kano ka jingïapher jingmut hapdeng kine ki arngut ki MLA u Bah Mawrie u la ong, “kam don kano kano ka jingïapher jingmut, ka shu dei tang ka jingïasngewthuh bakla namarba ki kwah ban ïatreilang ryngkat.”
Halor ka jingdawa jong ka UDP ban pynshitom ïa u Bah Shullai, u President ka BJP u la ong ba ka Part kam pat ïoh pdiang ïa kano kano ka jingthoh na ka UDP halor kane ka kam.
Ka UDP ka la phah da ka jingthoh pyrshah ïa u Bah Shullai sha u Myntri Rangbah ka Jylla u Conrad K Sangma, uba long ruh ha kajuh ka por u Chairman jong ka sorkar Meghalaya Democratic Alliance (MDA) uba la klar ban sa shim ïa ka rai ha ka por kaba biang.
