Shen yn lum jingïalang u Chairman ka Regional committee ba dei peit ïa ka thaiñ Langpih

Shillong, Risaw 02: U Myntri ba peit ïa ka tnat PHE bad uba dei ruh u Chairman jong ka Regional Committee ba la tjung da ka sorkar na bynta ban pynbeit pud na bynta ka West Khasi Hills District, Renikton Lyngdoh Tongkhar u la ïathuh ba na ka liang jong u un sa khot shen ïa ka jingïalang shuwa ban hair leit jurip sha ki jaka khappud kata sha Langpih na bynta ka kam pynbeit pud.
“Shen na ka liang jong ngi ngin sa lum ïa ka jingïalang hashuwa ba ngin leit jurip ïa kine ki jaka ïa kajia pud” ong u Bah Renik haba kren sha ki lad pathai khubor.
U la ong ruh ba na ka liang jong u ruh u kyrmen skhem ba kiba bun ki shnong kiba dei ha ka Langpih Sector yn ïoh ka jylla Meghalaya, “Namarkata, nga khot ïa ka jingïatreilang jong baroh ha kane ka bynta” u la ong.
Na ka liang jong u ruh u la ong ba kane ka jigpynbeit pud khamtam ha ki bynta jong ka Langpih Sector kin dei kiba kham jyrwit jyrwat bad kan kham jwat ruh ban ïa kiwei pat ki jaka. “La jar katta na ka liang jong ngi ngim riej satia hynrei ngin ïaid shakhmat ban weng syndon ïa ka jingeh ki paidbah kumba ngi la leh ruh ha ka Wat ba nyngkong” u la ong.
U la ong ba ka jinglah ban pynbeit pud kan pynshong nongrim beit ha ka jingkwah ki paidbah ba shong ha kane ka thaiñ ban jied shaei ki kwah ban leit ïasoh.
“Nga kwah ban kren da kaba shai ba ka jingeh ki paidbah khappud ka dei kaba ngi shimkhia bha namar ngi kwah ba ma ki ruh kin im ha ka jingsuk jingkmen’ u la ong.
Kumban shu kdew u bah Renik u dei ruh u Chairman jong ka committee kaba la thung da ka sorkar ha ka wat ba nyngkong jong ka jingpynbeit pud.