Lyngba ka Aspire Meghalaya shah pyntbit 3,800 ngut ki khynnah skul ha ka Soft Skill Training

Shillong, Risaw, 02: Palat 3,800 ngut ki khynnah na 18 tylli ki skul bad kolej ha ki distrik bapher bapher ki la ïoh pyntbit ïalade ha ka liang ka soft skill training bad ruh ban pynpaw ïa la ki sap ki phong lyngba ka Aspire Meghalaya prokram mynta u bnai.
Ha kaba ïadei bad kane, ka Sorkar Meghalaya, lyngba ka tnat treikam jong ka Sports & Youth Affairs, ryngkat ka jingïasnohkti lem ka tnat Education, ka la pynlong ïa ka prokram ‘Aspire Meghalaya’ ba la pyntreikam da ka AVENUES, Shillong. Naduh ba la sdang pyntreikam ïa ka mynta u snem, palat 13,000 ngut ki khynnah pule na 62 tylli ki skul bad kolej na kylleng ka jylla, ki lah ïoh kheit ïa u soh ka jingjop na kane ka prokram. La lah ban ithuh ruh ïa ki sap ki phong jong kumba 350 ngut ki khynnah pule lyngba ka rynsan pyni sap jong kane ka prokram.
Ka jingthmu jong ka Aspire Meghalaya ka long ban pyntbit ïa ki khynnah pule ha kiba bun ki liang shwa ba kin sdang wad kam wad jam, bad ruh ban pynshlur ïa ki ha ka ban sei ïa ki sap ki phong khnang ba yn ïoh ban pynïasnoh ïa ki bad ki skhim bapher bapher jong ka Sorkar Jylla.
Ha ka jingkren jong ka ha ka graduation function ha Mawkyrwat, ka Kong Jacqueline Una Kharpuri (MCS), Additional Deputy Commissioner, South West Khasi Hills, ka la ong, “Ki prokram kum kine ki ai jingmyntoi shibun ïa ngi ki ophisar ruh ban tip kham bniah bad ban ai mynsiem ïa ngi kumno ba ngi lah ban shakri kham bha na bynta ka imlang sahlang bad ka jylla hi baroh kawei. Ki jinghikai ba phi ïoh ki long ban pyntbit ïalade shimet ha kiba bun ki liang khamtam ha ka Communication Skill”. Ka la ai khublei ruh ïa ka kynhun ba ai training ïa ka jingminot jong ki ban ïarap ïa ki khynnah samla ban pynkhreh na bynta ka lawei jong ki. “Wat ym klet ïa ki jinghikai ba phi ïoh nangne bad pyrshang ban pyndonkam ïa ki ha ka ban pyntbit ïa ki sap ba phi don,” ka la bynrap shuh shuh.
U samla Jakusanrik M. Marak, Class 12, Dalu Government Higher Secondary School, u la ong, “Shwa kane ka prokram, nga ju pyrkhat ba ngam don eiei nalade ban noh synniang ha iing ha sem lane ha imlang sahlang. Hynrei kine ki jinghikai ki la ïarap ïa nga ban ithuh shai ïa la ka jong ka sap bad nga sngew ruh ba nga la kham shlur ban ïa kaba nga ju long.”
Ha ka jingkren jong u ha ka prokram ha Mairang, u Bah Alan B. Rymbai, na ka District Sports Office, West Khasi Hills, u la ong, “Ki don lai tylli ki D kiba long ka nongrim skhem jong ka jingjop – Discipline, Determination bad ka Devotion. Khlem ka discipline bad ka jingmut kaba skhem kan long kaba eh ban poi sha ka thong. Phi lah ban ym pat ithuh ïa la ka sap lane tip shai kaei kaba phi kwah ban leh ha ka jingim jong phi, hynrei ki prokram kum ka Aspire Meghalaya ki lah ban ïarap ban pynshlur ïa phi bad ban ai kata ka jingpynshai lane ka Clarity kumno ba phin nang ban buh ka thong ïalade.” U la ai khublei ïa ka team Aspire baroh kawei na ka bynta ka jingtrei shitom jong ki ban ai jinghikai ïa ki khynnah samla bad ban ïarap ïa ki ban ithuh ïa la ka jong ka sap kaba ki don. “Kaei kaba donkam ban leh nalade hi ka dei kata ka jingmut ba skhem (Determination) bad ban pyrshang nalade shimet hi (Devotion), bad phin lap ba ki lad ki lynti kin plie na bynta jong phi,” u la kyntu ïa ki khynnah.
Ka samla Daphilabet Kharbani, 1 st Semester, Nongstoin College, ka la ong, “Nga thrang shisha ban long nongrwai khnang ba ngan lah ban pynpaw ïa la ka jong ka sap. Hynrei nga don ruh kata ka jingsheptieng namar ba ngam ju don ‘confidence’ mynno mynno ruh. Dei lyngba kane ka training ba la ai jingmyntoi shibun ïa ngi ki khynnah samla ba nga la ïoh ïa kata ka mynsiem jong ka jingshlur ban ieng ha stage”.
Kawei na ki jingthmu ba kongsan jong ka Aspire Meghalaya ka dei ban ïarap khyllie ïa ki sap ki phong jong ki khynnah samla ka jylla. Nalor ki workshop ba pynlong ha ki skul, la ai ruh ïa ka rynsan ha kaba ki khynnah ki lah ban pyni ïa ki sap ki phong jong ki. Ki skul ki don ka bynta kaba kongsan ha kaban jied ïa ki nongmihkhmat sha ka distrik ha kaba ki don. Kin don ruh ki District Talent Committee ki ban jied pat ïa ki nongmihkhmat jong kawei pa kawei ka distrik sha ka rynsan ïakop pyni sap pyni phong jong ka jylla, ha kaba u paidbah jong ka jylla hi un ïoh shim bynta ban jied ïa ki nongjop ki ban yn sa ithuh paidbah kum kita ki ‘Aspire Meghalaya Stars’.