Shillong, Risaw, 02: Ka samoi treikam jong u Satya Pal Malik kum u Lat ka Jylla Meghalaya ka la kut noh ha ka 3 tarik mynta u bnai bad ka Sorkar Pdeng ka la pynkhamti ha u Lat jong ka Arunachal Pradesh u BD Mishra ban peit kum u Lat jong ka Jylla Meghalaya.
Katkum u kyrwoh na u Press Secretary jong ka President u Ajay Kumar Singh u la ong, “ka President jong ka ri India ka la thung ïa u Brig. (Dr.) B.D. Mishra (Retd.), u Lat jong ka Arunachal Pradesh, ban pynïaid ïa ki kam jong u Lat ka Jylla Meghalaya naduh ka sngi ba la pynkhamti ha u ïa ka kam ban peit ïa ka ophis jong u Lat ka Jylla Meghalaya tad haduh ban da pynbeit da kumwei pat.”
