Shillong, K’lyngkot, 24: U Myntri Rangbah ka Jylla Conrad K Sangma ha ka sngi Ba-ar ula ong ba ïa ka rai halor ka jingïakren biang halor u pud u sam bad ka Assam yn sa shim hapoh ka shi taiew.
“Ngi dang ïakren ïa kane bad sa shitaiew eiei, ngan sa pyntip sha phi lano ba ka jingïalang ïakren khappud kan long biang bad lehse ka jingleit jurip pud kaba ngi lah ban leh lang” ong u Conrad.
U Myntri Rangbah ula ïakynduh ïa u Myntri Rangbah ka Assam Himanta Biswa Sarma dang shen. “Nga la ïakynduh ïa u Himanta Biswa Sarma ha Guwahati. Ngi la ïashong bad ïakren, ngi la ïa bam jingbam step lang bad ym da don eiei hi halor ka jingïakren hynrei ka jingïakren ïakhana ka la ïaid slem bha halor kiba bun ki ishu kynthup ka kam khappud” ula ong haba bynrap ba namar kiba bun ki kam ba jia ha kine ki taiew bad ki bnai bala leit, ngim shym la ïoh ban leit ïakynduh biang.
