Shen ka MDA kan sa lum jingïalang ban ïatai halor ka Reservation bad ka Roster: Ampareen

Shillong, Jymmang 15: Ka Myntri jong ka sorkar jylla ka Kong Ampareen Lyngdoh ha ka sngi Nyngkong ka la ong ba na ka liang ka MDA shen kan sa shong ïa ka jingïalang ban ïatai halor ka Reservation Policy bad ka Roster System.
Haba ki nongthoh khubor ki kylli halor ka jingaipor ba 48 kynta ka VPP ïa ka sorkar jylla ban pynsahngeh shuwa ïa ka jingpynrungkam ha ki tnad katba ym pat lah ban pynbeit kumba la dawa, ka Kong Ampareen ka la ong ba na ka liang jong ka shimet ka ong ba ka jingleh ka VPP ka dei ka kamram jong ka Liang Pyrshah ïa ka sorkar ban pynbor ïa kino kino ki mat kiba ha ka jingsngew jong ki ki long kiba donkam.
“Ngam lah ban kren na ka bynta ka sorkar hynrei na ka jingsngew jong nga shimet hi ba ka jingïatai na bynta kane ka mat kan sdang shuwa hapdeng ki paralok ba don ha ka MDA nagnta lehse bad kiwei pat ki seng saiñ pyrthei, ki seng bhalang, ka kynhun ki samla pule namar kane ka mat ka long kaba buh jingma (Sensitive).” ka la ong.
“Ka long kaba bha lada ki dkhot ka Liang Pyrshah ki pynbor ïa ka sorkar bad na ka liang jong ngi kum ka sorkar ngin shim ïa ka por ban shim ïa ka rai tang shu wan poi u Myntri Rangbah ha Shillong,” ka la bynrap.
Ka la ong ruh kaba bakla ban ong ba na ka liang ka sorkar ka pyrshang ban thet ban ïakren ïa kane ka mat namar ka sorkar kan sa khot shen ïa ka jingïalang ban ïakren halor kane.