Ka mariang ka ai ki dawai ki kynbat ngi hap ban sumar ïa ka, ong u Sonowal ha ka jingplie ia ki jingtei thymmai ha NEIAH

Shillong, Jymmang 15: U Myntri Sorkar Pdeng ba dei khmih ïa ki tnat Ports, Shipping & Waterways bad Ayush, u Sarbananda Sonowal haba kren ha ka jingplie paidbah ïa hynriew tylli ki jingtei ba thymmai kum shi bynta ka Project II jong ka North Eastern Institute of Ayurveda & Homoeopathy (NEIAH). u la kuntu ïa ki nonghong shnong ka jylla ba kin long kiba sumar ïa ka mariang ha ryngakt ki dawai ki kynbat kiban long ki jingsumar ïa u briew haba u pang u shitom.
“Ka mariang ka la ai ïa ki dawai ki kynbat bad kum ki briew ba ïoh jingmyntoi na ka mariang ngi dei ban sumar ïa ka bad ka jingïaid shakhmat jong ngi ha ka ïoh ka kot kam dei ban wanrah ïa ka jingjot ïa ka mei mariang,” u la ong,.
U la ong ruh ba kumba ka jylla Meghalaya la ïoh kyrpang ïa ka jingkyrkhu na u Blei da ki psha mariang ka dei ka kamram jong baroh ban ïada ban pynneh pynsah ïa ka.
Na ka liang ka Kong Ampareen haba kren ha kane ka sngi ka la kyntu ïa u Myntri ka tnat Ayush ba un kynthup lang ïa ka rukom sumar tynrai jong ki jaidbynriew Khasi bad Garo kum kawei na ki lad ai jingsumar ha ka tnat Ayush bad kujuh ruh ba ka North Eastern Institute of Ayurveda & Homoeopathy (NEIAH) kan pynlong ïa ka jingtih bniah halor ka bor treikam ki dawai kynbat kiba ju pyndonkam ban sumar hapdeng ki Khasi bad Garo la da ki bun bun spah snem ba la leit,
Ha ka jingaikren bad ki nongthoh khubor, ka Kong Ampareen ka la ïathuh ba na ka liang u Sarbananda Sonowal u la khot sngewbha ïa ka sha ka jingïalang bah jong kane ka tnat kaban sa long ha ka 18 bad 19 tarik Jymmang ha Delhi na bynta ban ïakren bniah ïa kane ka mat.
Ka la ong ruh ba na ka liang jong ka kan sa buddien bha ïa kane ka ma khnang ba ki nongsumar tynrai kin ïoh lem ïa ka lad ban pynpaw pyrthei ïa ka sap sumar jong ki ha kane ka prokram kaba ïar ka sorkar India bad ba kin ïoh jingbtin lynti lem ha ka jingtih bniah shuh shuh na kane ka jaka pule.