Shillong, Jymmang, 15: Ka Myntri ka tnat ka Koit ka Khiah ka Dr. Ampareen Lyngdoh ha ka Lah Sngi U Blei ka la ïathuh ba ka la phah tohkit halor ka jingkynnoh ba ka don ka jingkhleh dawai Urea ha u khaw reshon.
Ha ka jingïakren bad ki lad pathai khubor ka Dr. Ampareen ka la ïathuh ba ka tnat Food and Safety ka la shim ïa u khaw ban phah tohkit ha ka testing centre bad ong ruh ba ïa ka kaiphod yn sa ïoh hapoh ar ne lai sngi.
Dang ha kine ki khyndiat sngi, kawei ka longïing jong ka Kong Sumita Mawthoh kaba sah ha ha ka shnong Wah Ïingsyiem, Smit ha ka 11 tarik mynta u bnai ka la kam ba u khaw baduk ba ka la ïoh u dei uba khleh lang bad ka dawai Urea.
Ka la ong, katba ym pat ïoh ïa ka kaiphod yn ym pat lah ban pynshisha la u dei shisha neem uba la khleh bad ka dawai urea kumba la kynnoh hynrei na ka liang ka tnad ka la shimkhia ïa kane ban ïada na kano kano ka jingma.
“Ngi la phah ban leh Test ïa une u khaw sha ka jaka ba dei hynrei ngi hap ap shwa ïa ka kaiphod bad hadien kane ngin sa wad pat sa ïa ka daw balei ka jia kumta,” la bynrap ka Dr. Ampareen.
Ka la ong ba ïa kane ka kam ym dei satia ban shim sting hynrei ka long kaba donkam ban phikir bha bad ha kajuh ka por ym dei ban shah ïano ïano ban leh ïa kum kine ki jingbakla namar kane ka long kaba ma.
