Shillong, Jymmang 15 :U Bah Seibor L. Nonglait uba dei u president barim jong ka seng ki nongñiah thuk thuk (TULBA Central Body) lyngba une u kyrwoh u la pynbna ba u la rai ban mih shakhmat ban ïa aireng ha kane ka ilekshon MDC ka ban long ha une u snem u ban wan na Mawlai Constituency.
U Bah Seibor u la pynpaw ba hadien ba u la shongthait noh na ka seng TULBA, ka mynsiem ka don hapdeng ka jinglynga ka pisa bad kam aijingsuk, bad kumta u la shim ïa ka rai ban rung sha ka lympung saiñ hima sima, kata ban ïa aireng ha kane ka MDC ilekshon ka ban wan na Mawlai Constituency.
“Kane ka dei ka jingkwah shimet jong nga bad ym don mano re mano ki ban pynbor, kumta paidbah nga wan sha phi ban pyntip ba nga da thrang shisha ban shakri hok ïa ka imlang ka sahlang, bad ka jingmih jong nga shakhmat ka dei ba nga don ka jingthmu ban ïakhun pyrshah ïa ki jingeh jong u paidbah ha kiba bun ki liang,” ong u Bah Seibor.
Nalor kata u la ong ruh ba u ïohi ba ka jingkyrmen ka la wanphai pat ha ki kam saiñ hima sima namar ba ka bor pisa kam donbor shuh ha ka jingïaleh ïa ka ilekshon. U la ong ruh ba watla um don ka pisa tyngka, hynrei tang kawei kaba u tyrwa ka long ban ai ka jingshakri ka ba khuid ba suba lada un ïoh ïa ka jingjop.
Ha kajuh ka por u la ong ruh ba u la ju ai ka jingshakri paidbah naduh ki por ba u dang khynnah bad kat haduh kane ka khyllipmat.U la ong ruh ba ka daw kaba la pynlong ïa u ba un shim ïa ka rai ban mih shakhmat ban ïa aireng ha kane ka ilekshon MDC ka ban wan ka long namar u kwah ban ïeng na ka bynta ki samla bad na ka bynta ka pateng ka ban sa wan. U la ong ba u kwah ba kane ka pateng kan dei ka jingkyrkhu ïa katei ka pateng ka ban sa wan.
Shuh shuh u Bah Seibor u la ong ba u don ïa ka jingangnud naduh ka mynsiem ban rat diengkhong ïa ka jingjyllei jong u drok namar u drok u dei u nonglute, u nongpynjot khamtam ïa ki khun samla, ïa ki longïing longsem bad ïa ka jaidbynriew.
Kawei pat ka jingangnud ka long ban ïakhun pyrshah ïa ka bamsap bampong namar ka jinghiar arsut ha ka ïoh ka kot, ka pule puthi bad ka jingbym ïoh ïoh jam jong ki samla ka dei namasr ka jingjyllei jong ka bamsap.
