Shillong, Jymmang, 15: Ka Federation of Khasi Jaiñtia and Garo People (FKJGP) Khliehriat Circle ha kine ki sngi ka la ïoh shibun ki jingujor na ki paidbah ha kaba ïadei bad ka jingrem shaba palat ka dor jong ki dieng kum ki dieng shna iing bad kiwei kiwei ki jait dieng hapoh Khliehriat, East Jaiñtia hill.
Kum ban shu pynkynmaw mynshwa ka dor jong ki dieng shna iing ha ki thaiñ Ladrymbai ka long tang T. 180 haduh T. 200 shi kubit hynrei mynta haduh ka dor ka la kiew T. 700 haduh T. 800 shi kubit.
Kane ka jingkiewdor ka la pyllong ïa ka seng ban wad ïa ka daw tynrai bad ban tih bniah.
“Ha ka jingwad jingtip, ka seng ka la ïoh ka jingtip kaba tikna, kata, ka dei namarba ïa ki jait dieng ba ju pyndonkam ban shna iing shna sem la shalan tuh baroh sha ka jylla Assam khlem ki kot ki sla kiba biang. Ka jingkwah jong ki trai Saw Mill kiba don hapoh rilum Jaiñtia ban die ïa ki dieng sha Assam ka dei namarba ka Assam ka lah ban thied ha ka dor kaba heh,” la ong u kyrwoh ba la phah da u President ka FKJGP Khliehriat Circle u Bah Mishal Chyrmang.
“Ka jingdawa dieng ha Assam ka long kaba jur bha bad kane ka pynlong ïa ki dukan die dieng kiba don hapoh ka jylla ban pynkiew dor namarba ka jingshalan tuh ïa ki dieng sha ka jylla Assam ka long kaba jur bha haduh katta katta. Kane ka jingpynbiang dieng ïa ka jylla Assam kan buh jingma ïa ki khlaw ki btap jong ka jylla Meghalaya bad kane kan pynlong ruh ïa ka jylla Meghalaya ban thied dieng kylla na kiwei ki jJylla ynda ki dieng hapoh ka Jylla ki lut bad kane kan buh jingma ruh ïa ki briew lajong khamtam kito ki baduk ba rangli ban ïoh dieng na ka bynta ban shna iing shna sem,” la bynrap u kyrwoh na ka Seng.
“Ki nong shalan tuh ïa ki dieng wat lada kim don ïa ki Permit ne Challan kiba biang hynrei kin lait da kaba suk ha baroh ki Check Point la ka dei jong ka tnad Forest ne ki Check Point jong ki Pulit namarba la don ka jing ïasngewthuh jingmut,” la kynnoh ka seng.
Ka seng ka kyrpad ïa ka tnad Forest khamtam ban peitngor bad ban ym ailad ïa ka jingshalan tuh ïa ki dieng shapoh ka jylla Assam bad ka seng ka maham ruh lada lap nangne shakhmat yn kem bad yn aiti beit sha ki bor ka jong ka aiñ.
