Shillong Jymmang 13: U Symbud Myntri Rangbah ka Jylla Bah Sniawbhalang Dhar uba peit ïa ka tnat Transport ha ka Lah Sngi U Blei u la pan kaipod halor ka jingshah kem jong u District Transports Officer jong ka East Garo Hills District Transport ha ki Pulit Assam halor ka jingkynnoh donkti ban shna thok ïa ki kot ki sla jong ki kali tuh.
“Nga dang ap ïa ka kaiphod (shwa ban shim ïa kano kano ka sienjam halor kane ka kam),” ong u Bah Dhar ha ka jingïakren bad ki lad pathai khubor.
U la ong ba kam pat long satia ïa u ban kren eiei la ïa u DTO ba la shah kem yn pynngat neem ha ka jingshah sospon.
“Ngam pat lah ban ai ïa ka jingtip kaba bniah halor kane ka jingjia. Ïai ap tad haduh ba ngan da ïoh nyngkong shwa ïa ka jingtip halor kaei kaba la jia nangta ngan sa lah ban ai jingpyntip ïa phi,” la bynrap u Symbud Myntri Rangbah.
Haba kylli, u Bah Dhar u la kubur ba ka long kaba donkam ban pynthikna ïa ka jingtreikam kaba khuid ba suba ha ki ophis jong ka tnat Transports ha ka jylla bad ong, “haoid, baroh ki jingtreikam ki dei ban long kiba khuid bad lada ka don kano kano ka jingleh bym dei bad ynda ngi la ïoh ïa ka jingujor ngin sa lah ban pynshitom katkum ka lynti kaba dei.”
Ha ka sngi U Blei, u DTO jong ka East Garo Hills u Genekelly G. Momin u la shah kem ha ki Pulit ka Assam halor ka jingdonkti ban shna thok ïa ki kot ki sla jong ki kali tuh.
Ïa u Momin la kem hapoh ka jingïalam jong u Circle Inspector u Siraj Ingti bad u Officer in-charge jong ka Agia Police Station u Manimoy Tamuly, u la ïalam ïa ka kynhun Pulit sha ophis u DTO ka East Garo Hills DTO kaba don ha Williamnagar.
Katkum ka jingïathuh jong ki Pulit, u Momin u dei uba donkti ban pynïaid ïa ka kam ban shna thok ïa ki kot kali, ki bym shym la rejistar, bad ïa kiba la rejistar biang ha Meghalaya da kaba pyndam ïa ki Chassis Number bad ïa kiwei kiwei ki jingdonkam ba kyrpang.
