Buh thong ka JHADC ban pynshisha ïa u pud u sam ka Khanduli lyngba ka Map

Jowai, Jymmang 15: U Chief Executive Member (CEM) jong ka Jaiñtia Autonomous District Council (JHADC) u Bah Thombor Shiwat ha ka Lah Sngi U Blei u la ïathuh ba u don ka jingangnud ban pynskhem ïa u pud u sam jong ka shnong Khanduli lada ki donkam ïa ka Map ban pynshisha ba kane ka shnong ka dang hap hapoh u pud u sam jong ka Jylla Meghalaya.
Ha ka jingïakren bad u Mawphor, u Bah Shiwat, u la kyntu ïa ka dorbar shnong Khanduli lada ka donkam jingïarap ki lah ban khot ïa ka Executive Committee jong ka JHADC ban pynshisha ïa u pud u sam kumba long ha ka shnong Mukroh ha kaba na ka liang jong ka Executive Committee ka JHADC ka la hiar jurip hi dalade haduh ka Zero Point jong ka shnong.
U CEM u la ïathuh ba ïa ka shnong Khanduli la pynskhem ïa u Waheh Shnong da ka District Council bad nalor kata ka dei ruh ka shnong kaba la biang pura ïa u pud u sam, hynrei kumba long mynta ka jingïakynad hapdeng ki Pnar bad ki Karbi ha khappud ka nang ïai bteng.
U la ong ba ka Council ka la pynsngewthuh sha ki paidbah ka Khanduli na ka por sha ka por ba ïa kane ka kam ïakajia pud kim dei satia ban ïaleh tang ka shnong hynrei kum ka shnong ki dei ban bat ïa kata ka jingïakut jong ka sorkar “Status Quo” katba ka jingïapynbiet pud ha ka wat kaba ar hapdeng ki ar jylla Meghalaya bad Assam kan dang ïaid shakhmat.
Dang ha ka sngi Palei jong ka taiew baladep, ka la mih ka jingmih huri hura bad ka jingïakynad hapdeng ki nongshong shnong ka Khanduli bad ki paid Karbi hadien ba ym shym la shah shuh markylliang ban ïarung ïa mih na kawei ka shnong sha kawei bad kane ka la nang kynton shuh shuh ïa ka jingïakynad.
“Kum ka Council ka kyrpad ïa ki nongshong shnong jong ka shnong Khanduli ba kin weng noh ïa kane ka jingïakynad,” u la ong bad bynrap, “ma u kum u CEM uba dei ruh u dkhot jong ka Regional Committee jong ka jingïapynbeit pud (ha ka wat kaba ar) u kwah ïa ki nongshong shnong ha khappud haba ki leh ïa kano kano ka kam kim dei ban leh khlem ka jingïatip lang bad ka sorkar.”
U la pynpaw ruh ka jinglyngngoh ha kine ki sngi ba ladep ba ka Shnong Khanduli ha ka jaka ban khot ïa ka District Council ban pynshisha ïa ki jaka puta hynrei ki la khot pynban da ki sengbhalang.
“Nga kyrpad ïa ka shnong Khanduli bad ïa ki paid Karbi ba kin ïai shah shipor ban wanrah ïa ka jingshongsuk shongshngaiñ namar wat na ka liang ki bor synshar Distrik na baroh arliang (West Jaiñtia Hills bad West Karbi Anglong District) ki ladep ïa mynjur ba lada don kino kino ki kam pynroi kiba jia ha khappud kim dei ban khanglad hynrei ki dei ban don ka jingïatip lang na baroh arliang.