Dawa ka KSU ïa ka Sorkar ban pynbeit shwa ïa ka jingeh ki paidbah ka Khanduli
Shwa ban jam sha ka jingpynbeit pud bad ka Assam
Shillong, Jymmang, 15: Ka Khasi Students’ Union (KSU), West Jaiñtia Hills Unit ha ka Lah Sngi U Blei ka la dawa ïa ka Sorkar Meghalaya ba kan pynbeit shwa ïa ka jingeh jong ki paidbah ka shnong Khanduli, West Jaiñtia Hils Distrcit kiba don hapdeng ka jingïakynad bad ki Karbi ka West Karbi Anglong District shwa ban jam sha ka jingïakren pynbeit pud bad ka Jylla Assam ha ka wat kaba ar.
Dang shen ka la mih ka jingïakynad hadien ba ki nongshong shnong jong ka shnong Khanduli ki la shah kthong ha ki Karbi katba ki dang leit rep sha ki lyngkha bad kane ka la pynmih ruh ïa ka jingshongsyier ha khappud.
Ha ka jingïakren bad ki lad pathai khubor u President jongka KSU West Jaintia Hils u samla Laitphar Syngkrem u la ong ba ka jingïakynad hapdeng ki jaidbynriew Pnar bad ki Karbi ka la mih namar ka jingbuh jong ka Karbi Anglong Autonomous Council (KAAC) ïa ka khyrdop khrong khajna hapoh ka shnong Khanduli kaba dang hap hapoh u pud u sam jong ka jylla Meghalaya.
U la ong ba ka jingdon jong kane ka khyrdop khrong khajna jong ka KAAC bad ka jingshah pakhang lynti jong ki nongrep na ka shnong Khanduli ka la pynmih jingeh ïa ki paidbah namarba ki hap ban siew khajna nalor ba kim ïoh ban leit sha ki jaka rep.
“Hadien ka jingweng noh ïa ka khyrdop lum khajna jong ka KAAC ha Khanduli, ka jingïakynad ka la jah noh hynrei kynsan kynsan ka jingïakynad ka la sdang biang hadien ba ki Karbi ki la wiang ding ïa ka iing trep bad khang lynti ïa ki Khasi-Pnar ban leit sha ki jaka rep watla ki jaka rep ki dang hap ha u pud u sam ka Meghalaya,” la ïathuh u samla Laitphar Syngkrem.
U ong ba ka KSU bad ki paidbah ka thaiñ khappud ki dawa ïa ka sorkar Meghalaya ba ka dei shimkhia ïa kane ka jingshah pyndik jong ki Pnar kiba don hapoh ka shnong Khanduli namarba kane ka jingshah pyndik ki paradoh parasnam ka dang bteng haduh kine ki sngi.
Shuh shuh u la ong ba ka seng ka la ïakynduh ïa ki bor synshar jong ka West Jaiñtia Hills bad West Karbi Anglong District hynrei haduh mynta ki jaidbynriew Pnar ki dang ïai mad ka jingshah pyndik ha ki Karbi kiba sah ha u pud sam jong ka jylla Assam.
“Ngi dawa ïa ka Jaiñtia Hills Autonomous District Council ba kan shimkhia ïa kane ka jingeh jong ki paidbah ka shnong Khanduli ban ïakren bad ka Sorkar Assam bad ïa ka Karbi Anglong Autonomous Council khnang ba ki nongrep na ka shnong Khanduli kin lait na ki jingshah pyndik bad ba ka shongsuk shongsaiñ kan wan phai biang,” la bynrap u Samla Laitphar Syngkrem.