Shah tap ki hali bad u kba ha Pynthorneiñ, duh nong ki nongrep, pan jingïarap na ki bor sorkar

Jowai, Naitung 15 : Ki Trai hali bad ki Nongrep ha ki bynta jong ka Pynthorneiñ kaba dei ka ‘pliang ja’ jong kiba bun balang, mynta u snem kila ngop haka jingsngewsih kthang na ka daw ka jingshah pynjulor ki hali rep na ka jingwan poi ka khyndew, u shyiap bad ki maw lyngba ka ‘liar Kamkam’ hadien bala pyntrei ïa u surok By-Pass na Khliehtyrshi haduh Tre Iongriang.
Kane ka jingshah pynjulor jong ki hali rep kala jur bha shaba palat mynta u snem wat ka lynti ïaid jong ka’ liar kamkam’ kala kylla jaka ïaid da kaba tuid noh lyngba ki hali rep kiba don ha Pynthorneiñ haduh ba ki nongrep kim lah shuh ban pynkhuid ïa kitei ki maw bad u shyiap kiba la tap lut ïa ki kba uba dang shu dep thung.
U President ka Khooid Ya Ka Wah Myntdu u ma Khroo L. Pariat ula hiar ban sakhi lang ïa kitei ki hali kiba shah ktah ha Pynthorneiñ mynta ka sngi, ula ong kane ka dei na ka daw ka jingpyntrei ïa u surok By-Pass namar ïa ka khyndew kaba la theh pathar la kit noh da ka um sha kine ki bynta jong ka Pyntharneiñ.
“La kumno kumno ki longïing kiba shah ktah kam duna ïa ki 10 tylli, katba ki nongbam kiba dang shañiah ïa u kba na kane ka jaka lada shim ïa ka jingïoh ïa u kba kala poi sha ka 600 byrni ka jingduh”, la ong u ma Pariat.
Ula ong kane ka jingduh nong ka long na ka jingbym shim khia jong ki bor District wah hadien ba ka seng ki nongrep ka “Ka Myntdu Pynthorneiñ Farmer Welfare & Producer Organisation” (MPFW&PO) kala dep ban ujor ha u DC naduh u snem bnai January, 2022 ban dawa pynsangeh ïa ka jingtheh khyndew pathar, hynrei ki bor ba dei peit kim shem la pyntrei kam ïa bor halor kane ka jingai jingmut ka seng.
Kumba long mynta ula kren diaw ba ka sorkar kam sngap shuh ïa ka jingeh jong ki nongrep bad kumjuh ïaki trai hali kiba pynmih ïa u khaw u kba. Ula kren shai kum ka seng “Ka Myntdu Pynthorneiñ Farmer Welfare & Producer Organisation” (MPFW&PO) ha ryngkat ki trai hali bad ki nongrep kim banse ban leit ujor noh ïa kane sha ïing bishar jong u District Session Court ha Khliehtyrshi.
Ula ban jur halor ka jingïoh lad jong ki briew ban tei ïing hajan ka Wah Myntdu bad kane kala buh jingeh ïa ka Wah naka jingmih ki jaboh jabaiñ kiba ha rukom bad leit tuid sha ki bynta ka Wah.
Ka kong Middle Pakynteiñ kawei na ki trai hali ba shah ktah kala ong “ngi la duh ïa u kba u khaw bad ngi la duh ruh ïa ka um bam kaba khuid ba suba”. Kumta ka kyntu ïa ka sorkar ba kan shim khia ïa kane ka jingeh kaba la pynkthang mynsiem ïa ki na ka jingshah pynjulor ki hali.
U ma Kamniwan Pakynteiñ trai hali ula ong mynta u snem ka jingduhnong kala jur bha ym kum ha ki snem ba la dep, kumta u buh ka jingkyntu ïa ki bor sorkar ban peit ïa kane ka jingeh.
Sa uwei u trai hali ma Mikil Rymbai ula ong la 70 tylli ki snem kane ka dei ka jingduh nong kaba khraw eh naduh u trai hali bad haduh u nongbylla rep, ula ong mynshwa ka jingpyntrei ïa u surok na Riatturiem kam shem ktah namar la trei da ka bor u briew, hynrei mynta da kaba pyndonkam da ki kor ki bor la pynjulor tang ha ki kyndiat kynta, halor kane ka sorkar ka dei ban wan jurip ïa kane ka jingeh.