Shah rong umsaw u kpa bad u khun, bteng ka jingwad ka SRT ban lap ïa ki met

Shillong, Risaw, 05: Arngut ki briew ba kynthup ïa u nonghikai bad u khun shynrang jong u, ki la shah rong ha ka um hynnin ka miet ha Dimapara.
Ka khubor na ka tnat DIPR ka la pyntip ba ka jingwad ïa kine ki shi kpa shi khun kiba la shah rong ha ka umsaw ka dang bteng haduh mynta da ka kynhun Search and Rescue Team (SRT).
Ha ka sngi Saitjaiñ u Myntri ka Sorkar Jylla u Abu Taher Mondal u la leit jngoh ïa ki lanot shlei um kiba sah ha ki ktem rieh tngen shipor ha ka shnong Dalu bad ha kiwei kiwei ki shnong kiba marjan bad pynlong ruh ïa ka jingïalang pyrkhat kam bad u Deputy Commissioner ka West Garo Hills kynthup ruh bad u Block Devlopment Officer (BDO) ka Dalu C&RD Block.
U Mondal u la ïohlad ban ïakren bad ban sngap ruh ïa ki jingeh ba ki lanot ki la mad ha kine ki sngi.
Watla ka jinglong jingman jong ka mariang ka la kham biang, hynrei ka jingïathuh lypa ïa ka jinglong jingman jong ka suin bneng ka kdew ba ka jingther jong u lapbah lapsan kan dang bteng sa ha ki 24 kynta ki ban sa wan.
U Mondal u la bthah ïa ki bor synshar jong ka West Garo Hills District, ïa u Block Development Officer (BDO) bad ïa ki nongtrei jong u ban pynbiang jaka sah na ka bynta ki lanot bad kynthup ruh ïa ka bam ka dih.
La bthah ïa ki paidbah ba kin shong kin sah shwa sha ki jaka kiba kham shngaiñ ha kine ki 24 kynta bad ban bud ryntih ruh ïa ki jingmaham halor ka jinglong jingman jong ka suiñ bneng.
Shuh shuh u Mondal u la bthah ïa baroh ki tnat treikam jong ka Sorkar ban kitkhlieh la ka jong ka kamram.
Hadien kane, u Mondal u la leit jngoh ïa ka CHC ha Dalu ban lum jingkheiñ ïa ka jingdon jong ki lanot kiba la mad ïa ki jingmynsaw ha ka jingtwa khyndew na ka jingther u lapbah lapsan.
Khnang ban peit ïa ka koit ka khiah jong ki lanot, ki nongtrei ka koit ka khiah ruh ki la leit jngoh ïa ki ktem sah shipor jong ki lanot bad ban ai jingïarap.
Ki bor ba dei peit jong ka MeECL ki la maramot ïa ka bording ha ka shnong Dalu ha kaba ki paidbah ki la ïohlad ban wad jingtip ïa ki jinglong jingman jong ki bahaing hasem lyngba ka mobile phone bad kumjuh ruh ban pyndonkam ïa ka Internet.
Ha kane ka sngi, u Myntri ka Sorkar Jylla u Rakkam A. Sangma u la leit jngoh ïa ka jaka ba la shah rong ka jingkieng dieng Kujikura, ha wah Bakala, Dalu.