Shillong, Naiwieng 08: Ka Ramakrishna Mission Vivekananda Cultural Centre, Shillong, ka la rakhe ïa ki jingjop jong ka kynhun ba 107 jong kiba shah hikai Computer bad ka kynhun kaba 46 jong kiba shah hikai language.
Ha kane ka prokram la sam haduh 745 tylli ki syrnot ïa kiba shah hikai ha ka jingïalang pynkup burom kaba kyrpang kaba la pynlong ha ka por shiteng sngi, kaba dei ruh ka jingïeng skhem na ka bynta ka jingpynkupbor ïa ki samla pule.
Ka Ramakrishna Mission Vivekananda Cultural Centre, Shillong ka ïeng skhem na ka bynta ka jingpynkupbor ïa ki samla lyngba ka pule puthi bad ka jingkyntiew ïa ki sap. Kane ka jaka ka ai jinghikai ïa kumba 6,000 ngut ki briew ha ka shi snem ha ki jingpule computer kiba pynlong ha san tylli ki bynta.
Kane ka jingpynkup burom mynta ka dei ka jingithuh ïa ka jingjop jong kumba 1,000 ngut ki shah hikai na ki jylla bapher bapher jong ka thaiñ shatei lammihngi kaba dei ruh ka jingithuh ïa ka jingtbit ha ka pule puthi
bad kito kiba la wan hakhmat duh ha ki thup bapher bapher ha kaba kine ki la ïoh ïa ki memento bad ki khusnam ba kyrpang.
Kiba la shah hikai kiba la ïoh jingithuh namar ka jingleh bha jong ki ha ka jingpule, ki long ha ka Computer-Beginner: Melabet Joan Mawrie, ha ka Intermediate: Emma Dora Lyngdoh Nonglait, ha ka Tally-I: Naphisabet Marweiñ, ha ka Tally-II: Riya Das
DTP & Webdesigning: Badarisha Khriam, ha ka Database: Medarishisha Ryntathiang, ha ka Python: Iarilang Lyngdoh Nonglait, ha ka DEO: Reynold.
Shuh shuh ka Iarilang Lyngdoh Nonglait bad u Silvester Sylliang ki la ïoh ïa ki kor computer namar ka jingleh bha jong ki. Ha kane ka sngi la ïoh ïa ki ktien ba kitbok kitrwiang na u Swami Vedeshananda, Director of Academics ha kane ka jaka pule ha kaba u la kitbok kitrwiang ïa kiba shah hikai bad u la pynshlur ïa ki ba kin don ki jingmut jingpyrkhat kiba bha.
U la kren ruh shaphang ka jingkongsan ban don ka nongrim kaba khlaiñ ha ka imlang sahlang mynta bad u la kyntu ïa ki samla ba kin ïoh mynsiem na ki jinghikai u Swami Vivekananda.
Katba u Prof. Monotosh Chakrabarty, Vice Principal ka St. Edmund’s College, u la ai jingkren ha kaba u la ïaroh ïa ka jingtrei shitom ki nonghikai bad ka jingïeng skhem kane ka jaka pule ban ai ka pule puthi kaba bha ïa ki samla kiba wan na ki longïing bapher bapher.
U Swami Divyaswarupanandaji Maharaj, Center-In-Charge, u la pynkut ïa kane ka prokram da kaba ai jingsngewnguh ïa baroh kiba la ïadon bynta bad da kaba ai ki ktien jong u Swami Vivekananda ha ka ktien Khasi bad Phareng.
Ha kaba ïadei bad ka khana shaphang ka Ramakrishna Mission Vivekananda Cultural Centre, Shillong, la ïathuh ba ka Ramakrishna Mission Vivekananda Cultural Centre, Shillong, ka dei ka kynhun ka bym trei na ka bynta ka jingïohnong bad ka peit ïa ki kam kiba ïadei bad ka jingngeit bad ka jingai jingshakri ïa ka imlang sahlang.
La ong ba kane ka centre ka ai ki jinghikai bapher bapher ba kynthup ïa ka training ha ki kam computer, ki jingpule ïa ka ktien ka thylliej bad ki kam kiba ïadei bad ka deiriti.
